Browsing Tag:

bakstur

Annað

Vatnsdeigsbollur

bollur a bolludegi

Þeir sem að þekkja mig vel vita að ég elska bolludaginn og bolludagsbollur. Ég tel það ekki eftir mér að halda fleiri en eitt bollukaffi og borða bollur marga daga í röð. Hver þarf kvöldmat, þegar það eru bollur?! Ég geri þó aðeins vatnsdeigsbollur. Gerbollur, eða rúnstykki með rjóma, finnst mér ekki passa í þennan tiltekna fögnuð.

Ár hvert byrja ég að æfa mig í bollubakstri og klúðra iðulega einum skammti, í það minnsta. Stundum hafa bollurnar fallið, allar sem ein en þær eru svosem ekkert verri á bragðið fyrir það. Ég vil nefnilega að bollurnar hafi ákveðna mýkt, séu ekki þurrar og pappírskenndar. Ég er ekki frá því að nú hafi ég dottið niður á hina einu sönnu uppskrift

Vatnsdeigsbollur

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Bakstur
Serves: 18-20 bollur
Cooking Time: 25-28 mín

Einföld og skotheld uppskrift sem er á flestra færi

Ingredients

  • 170 g smjör
  • 400 ml vatn
  • 200 g hveiti
  • 1/2 tsk lyftiduft
  • 1/2 tsk salt
  • 4-5 stór egg

Instructions

1

Hitið ofninn í 180 gráður, blástur. 190 gráður ef þið kjósið að nota undir/yfir hita.

2

Hitið saman í potti vatn og smjör og látið sjóða í 2-3 mín, takið af hellunni og látið aðeins rjúka úr.

3

Blandið saman í skál hveiti, salti og lyftidufti.

4

Hellið hveitiblöndunni út í pottinn og hrærið saman með sleif þar til að þétt deigsoppa hefur myndast.

5

Færið yfir í hrærivélaskál og látið rjúka vel úr deiginu, hvílið helst í 10 mín.*

6

Bætið eggjum út í einu í einu og hrærið vel á milli. Skafið niður úr skálinni reglulega með sleikju.

7

Fimmta eggið skulið þið ekki brjóta beint út í skálina heldur píska saman í lítilli skál og bæta við smátt og smátt þar til að rétt áferð er komin á deigið. Það á að vera frekar þykkt og leka letilega af sleif, þó án mótstöðu.

8

Setjið deigið í sprautupoka með frekar víðum stút og sprautið á bökunarpappír með þokkalegu bili á milli. 12 bollur á plötu ca.**

9

Bakið í 25-28 mín eða þar til bollurnar eru orðnar vel gullinbrúnar. Til að koma í veg fyrir að þær falli skulið þið ekki opna ofninn fyrstu 23 mín.

Notes

*Það er ekki nauðsynlegt að nota hrærivél en það auðveldar vinnuna heilmikið. Þeir sem hafa ekki aðgang að hrærivél geta haft deigið áfram í pottinum og hræra þá eggjunum saman með sleif, einu í einu. **Hægt að nota tvær matskeiðar í stað sprautupoka.

bollur a bolludegi
Fremstar eru Oreo-bollurnar en þær hlutu mikið lof

Þegar bollurnar hafa kólnað byrjar svo fjörið! Ég er mikill aðdáandi hinnar klassísku bollu með sultu, rjóma og glassúr en það er líka gaman að breyta til. Í ár var ég með eftirfarandi útfærslur:

  • Jarðarberjasulta, rjómi og glassúr á toppnum
  • Nutella, jarðarber og glassúr á toppnum
  • Tobleronerjómi, Toblerone kurl, jarðarber og flórsykur á toppnum
  • Nougat, vanillurjómi og flórsykur á toppnum
  • Oreorjómaostafylling, oreorjómi og hvítt súkkulaði á toppnum
  • Karamellusósa, jarðarber, daimrjómi og karamelluglassúr á toppnum
bollukaffid
Hinar klassísku með sultu, rjóma og glassúr sem aldrei klikka

Um að gera að leyfa hugmyndafluginu og bragðlaukunum að ráða för. Njótið sem allra best þessa rest af bolluhelgi og að sjálfsögðu á bolludaginn sjálfan, þann allra helgasta. Þessi veisla er nú bara einu sinni á ári!

XOXO

Stella Rún

Brauð og gerbakstur/ Jólabakstur/ Jólin

„Cinnabon“ kanilsnúðar í jólabúningi

Sticky snudur

Það er ekkert lát á kanilsnúðabakstri á þessu heimili, skal ég segja ykkur. Þegar að þessi bylgja klárast, vonandi sem fyrst, verðum við dóttir mín orðnar að kanilsnúð! En grínlaust er eitthvað við ilmandi gerbakstur sem yljar og gleður unga sem aldna. Við höfum verið mikið úti að leika og það er ekkert eins ljúft og að koma inn og finna lyktina af nýbökuðum snúðum!

snudakaka
Ég fæ vatn í munninn við að horfa á þessa mynd!

Þessir snúðar hér að neðan hafa verið klæddir í jólabúning. Það er nefnilega kominn nóvember og mér er sama hvað Grinch segir, jólin nálgast. Fyllingin er ekki hefðbundin en ég bætti við muldum piparkökum sem gefa svakalega gott bragð sem og örlítið bit sem er svo gott með dúnmjúkum snúðunum. Til að toppa dásemdina er saltri karamellu dreift yfir snúðana þegar þeir koma úr ofninum. Ég legg ekki meira á ykkur!

Kanilsnúðar með piparkökumulningi og karamellusósu

1 Star2 Stars3 Stars4 Stars5 Stars (No Ratings Yet)
Loading...

Ingredients

  • 150 ml vatn
  • 250 ml mjólk
  • 90 gr smjör
  • 1 msk sykur, til að vekja gerið
  • 1 pakki þurrger eða ca. 11 gr
  • 1 tsk salt
  • 1 egg
  • 60 gr sykur
  • 750 gr hveiti, etv. aðeins meira ef deigið er of klístrað
  • Fylling:
  • 100 gr mjúkt smjör
  • 100 gr púðursykur
  • 50 gr sykur
  • 2 msk kanill
  • 100 gr muldar piparkökur
  • Saltkaramellusósa, til að dreifa yfir eftir að snúðarnir koma úr ofninum

Instructions

1

Byrjið á að hita saman (í potti eða í örbylgjuofni) vatn, mjólk og smjör.

2

Setjið blönduna í hrærivélaskál og gætið þess að hún sé ekki of heit, fingurvolg á hún að vera.

3

Bætið 1 msk sykri og gerinu saman við og leyfið gerinu að freyða.

4

Bætið salti, eggi, sykri og hveiti í skálina og hnoðið með deigkróknum þar til að mjúkt og samfellt deig hefur myndast. Ef ykkur finnst deigið of klístrað og erfitt að vinna með má bæta við smávegis hveiti en gætið þess að setja ekki of mikið. Deigið á að vera mjúkt og örlítið klístrað.

5

Þegar deigið er komið saman skulið þið mynda úr því kúlu og smyrja með bragðlítilli olíu.

6

Leyfið að hefast undir rökum klút í 90 mín eða þar til deigið hefur tvöfaldað stærð sína.

7

Stráið smávegis hveiti á sléttan flöt og fletjið deigið út í ca. 30*50 cm ferhyrning. Það á að vera smávegis þykkt í deiginu.

8

Blandið saman mjúku smjöri, púðursykri, sykri og kanil og smyrjið á deigið svo smjörblandan hylji allt saman vel.

9

Stráið þá muldum piparkökunum yfir og þjappið aðeins ofan í deigið.

10

Rúllið upp og skerið í ca. 16 jafna hluta.

11

Raðið í smurt eldfast mót, gæti þurft tvö (eitt stórt og eitt minna), og leyfið að hefast í 30 mín í viðbót.

12

Hitið ofninn í 180 gráður, undir/yfir hita og bakið þar til snúðarnir hafa fengið á sig fallegan lit (20-25 mín).

13

Þegar snúðarnir eru komnir úr ofninum skulið þið dreifa vel af karamellusósu yfir.*

Notes

*Í highligts á instagram sýni ég frá því hvernig ég græja saltkaramellusósu á einfaldan máta en það má vel nota keypta sósu eða þá uppskrift sem ykkur þykir best. Ég skal svo koma uppskriftinni að karamellusósunni inn á síðuna við allra fyrsta tækifæri.

Fyrir fullkomna haust- eða jólastund mæli ég svo með að þið lagið ykkur smávegis heitt súkkulaði til að njóta með snúðunum. Annað hvort þetta hér, óveðurskakóið eða þá þessa jólaútgáfu sem er með dásamlegu piparmyntubragði!

XOXO

Stella Rún

Kökur/ Smákökur

Súkkulaðibitakökur með smá tvisti

sukkuladibitakokuhruga

Smá játning á miðvikudegi. Ég hef haft afskaplega lítinn áhuga á því að elda spennandi mat síðan þriðja bylgjan skall á okkur. Mig langar endalaust í eitthvað nýbakað og sætt og hef því verið í mikilli tilraunastarfsemi í bakstursdeildinni. Nýjasta verkefnið – súkkulaðibitakökur.

Ég hef ekki tölu á því hversu margar súkkulaðibitakökuuppskriftir ég hef prófað í gegnum tíðina. Subway-kökurnar góðu hafa oft verið fyrirmyndin og markmiðið verið að baka smákökur sem eru mjúkar í miðjunni og stökkar á köntunum. Einhverra hluta vegna var þetta eilífðarverkefni, alltaf eitthvað sem truflaði mig við áferð, aðferð eða bragð. En ekki lengur!

Súkkulaðibitakökur með hnetusmjörsdropum.

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Smákökur
Cooking Time: 10-12 mín

Syndsamlega góðar smákökur!

Ingredients

  • 220 g smjör, við stofuhita
  • 100 g sykur
  • 200 g púðursykur
  • 2 egg
  • 1 tsk vanilludropar
  • 1/2 tsk lyftiduft
  • 1 tsk matarsódi
  • 1/2 tsk salt
  • 390 g hveiti
  • 200 g suðusúkkulaði
  • 100 g hnetusmjörsdropar eða hvítt súkkulaði (má sleppa)*

Instructions

1

Hitið ofninn í 180 gráður, undir/yfir.

2

Þeytið saman smjör og sykur þar til það er létt og ljóst.

3

Bætið eggjum saman við einu í einu og vanilludropum.

4

Blandið öllum þurrefnum saman við og hrærið þar til deigið er rétt komið saman.

5

Bætið þá súkkulaðinu og hnetusmjörsdropunum saman við.

6

Kælið deigið í minnst 30 mín áður en þið bakið.

7

Það má líka kæla yfir nótt eða hreinlega frysta og baka síðar. Kælingin er nauðsynleg til að koma í veg fyrir að kökurnar renni út á plötunni. Við viljum að þær verði þykkar og djúsí.

8

Bakið í miðjum ofni í 10-12 mín. Kökurnar munu líta út fyrir að vera aðeins of lítið bakaðar.

9

Takið út og leyfið að kólna á plötunni í nokkrar mín.

Notes

Það gæti komið vel út að skipta hluta af súkkulaðinu/hnetusmjörsdropunum út fyrir hnetur af einhverju tagi. Allt eftir smekk hvers og eins. Hnetusmjörsdropana keypti ég í Hagkaup.

Hinar fullkomnu súkkulaðibitakökur, að mínu mati. Þær fengu mikið lof heimilismanna svo bæði litlir og stórir munnar mæla með því að þið skellið ykkur í bakstur, ekki seinna en á morgun.

XOXO

Stella Rún

Kökur/ Ömmumatur

Sjónvarpskakan gamla og góða

sjonvarpskaka m kaffinu

Þegar ég fór að halda mitt eigið heimili fannst mér alveg nauðsynlegt að koma mér upp girnilegum uppskriftabanka þar sem að hægt væri að finna alla þessa gömlu og góðu rétti og kökur sem ég hafði alist upp með. Þetta hefur gengið ágætlega og á ég nú uppi í erminni ýmsar uppskriftir sem hafa gefið sérlega góða raun og fá alltaf mikið lof. Gott dæmi er þessi skúffukaka.

Önnur kaka sem að mér finnst nauðsynlegt að fólk prófi að baka er sjónvarpskaka. Það er eitthvað við þessa mjúku, gulu köku með kókosbráðinni ofan á sem að hittir mann beint í hjartastað. Ég vil í raun meina að ég hafi lokkað eiginmanninn til mín með þessari köku en hún er hans uppáhald. Lyktin af nýbakaðri sjónvarpsköku er engri lík og að mínu mati er best að skola henni niður með ískaldri mjólk.

Sjónvarpskaka

1 Star2 Stars3 Stars4 Stars5 Stars (2 votes, average: 4,00 out of 5)
Loading...
Bakstur
Prep Time: 20 Cooking Time: 30-40 mín Total Time: 1 klst

Létt og ljúf kaka með ómótstæðilegri kókoskaramellubráð.

Ingredients

  • 4 egg
  • 300 gr sykur
  • 1 tsk vanilludropar
  • 1 tsk salt
  • 3 tsk lyftiduft
  • 260 gr hveiti
  • 2 dl mjólk
  • 50 gr smjör, brætt
  • Kókosbráðin:
  • 100 gr smjör
  • 200 gr púðursykur
  • 1/2 tsk vanilludropar
  • 150 gr kókosmjöl
  • Ca. 1/2 dl mjólk, etv. minna

Instructions

1

Hita ofninn í 170 gráður, undir/yfir.

2

Hræra saman sykur og egg þar til létt og ljóst. Bæta út í vanilludropum og blanda.

3

Sigta þurrefnin saman við og hræra þar til deigið er rétt komið saman. Passa að ofhræra ekki svo kakan verði ekki seig.

4

Bæta mjólk og bræddu smjöri saman og hræra saman. Deigið er nú frekar þunnt en þannig á það að vera.

5

Hella deiginu í skúffukökuform.

6

Baka við í 25-30 mín (fer eftir ofnum).*

7

Bræða saman smjör og púðursykur í potti þar til sykur er laus við kristalla. Bæta vanilludropum og kókosmjöli saman við og hræra. Ef blandan er of þykk skal bæta mjólk saman við, einni og einni matskeið í einu þar til að blandan er fallega gullinbrún og nógu þykk/þunn til að dreifa yfir kökuna sem ætti að vera rétt bökuð eftir ca. 25 mín í ofninum.

8

Smyrjið kókosbráðinni á kökuna og bakið áfram í 5-7 mín. Takið úr ofninum og leyfið kökunni að kólna og bráðinni að taka sig áður en þið berið fram með ísköldu mjólkurglasi!

Notes

*Eins og ég hef áður minnst á eru ofnar afskaplega mismunandi. Það er því best að athuga með kökuna eftir ca. 23 mín og bætið við baksturstímann eftir þörfum. Hún á að vera rétt bökuð í miðjunni þannig að prjónn sem stungið er í hana miðja komi hreinn út. *Stundum breyti ég stillingunni á ofninum í lokin yfir á grill og "grilla" kökuna í 1-2 mín. Þetta smá trix gefur svo góða áferð á kókosbráðina.

Ég get lofað ykkur því, kæru lesendur, að þessi ljúfa kaka smellpassar með helgarkaffinu. Hún er líka góð í heimavistinni sem Covid skikkar okkur í, svo hvort sem er um helgi eða á virkum degi – sjónvarpskaka, gjörið svo vel!

XOXO

Stella Rún

Kökur/ Ömmumatur

Skúffukaka drauma minna

skuffukaka og mjolk

Eins og nýbakað, ylvolgt og dásamlegt bakkelsi getur verið gott er fátt eins svekkjandi og þurrt og óspennandi bakkelsi. Því miður lendir maður samt svo oft í því að festa kaup á kökusneið sem stenst ekki væntingar. Þá er nú alveg eins gott að lúra á góðum banka af skotheldum uppskriftum og baka bara heima.

Ég tel mig hafa fundið hina fullkomnu skúffukökuuppskrift en ein slík verður að vera til á hverju heimili. Það er þó með skúffuköku eins og aðrar kökur að sitt sýnist hverjum og það eru ekki allir á einu máli um hvað er best. Ég kýs að hafa skúffuköku dökka og mjúka, næstum klístraða með mátulega þykku lagi af glansandi smjörglassúr. Stundum er ég samt villt og set gamaldags súkkulaðismjörkrem ofan á, skúffukaka í sparifötum.

Uppskrift þessi helst mjúk og góð í marga daga svo lengi sem loki eða plasti er smellt yfir formið. Venjulega baka ég hana í þessu staðlaða skúffukökuformi en hún passar líka prýðilega í tvö hringform (ca 22 cm). Ef það á að baka fyrir marga er hægt að tvöfalda uppskriftina og baka í ofnskúffunni.

Skotheld skúffukaka

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Bakstur
Prep Time: 10 mín Cooking Time: 30-40 mín Total Time: 40-50 mín

Einföld og góð kaka sem allir geta bakað

Ingredients

  • 400 gr sykur
  • 260 gr hveiti
  • 75 gr kakó
  • 1 tsk lyftiduft
  • 1 tsk matarsódi
  • 1 tsk salt
  • 2 stór egg
  • 2 tsk vanilludropar
  • 2 dl AB mjólk, má nota súrmjólk
  • 2 dl vatn
  • 175 gr smjör, brætt

Instructions

1

Hitið ofninn í 170 gráður, undir/yfir hita.

2

Blandið þurrefnum saman í þokkalega stórri skál.

3

Bætið vanilludropum, AB mjólk, vatni og smjöri saman við og blandið þar til deigið er slétt og fellt og þokkalega kekkjalaust. Varist þó að hræra of mikið því annars verður kakan þétt og þung í sér.

4

Hellið deiginu í smurt skúffukökuform eða tvö hringlaga form og bakið í miðjum ofni í 30 mín.*

5

Þegar kakan hefur nánast kólnað að fullu skal smyrja hana með glassúr og strá kókosmjöli yfir (ef vill).

Notes

Enn og aftur minni ég á að ofnar eru mjög mismunandi. Kakan gæti því þurft lengri eða skemmri tíma í ofninum ykkar en hún er tilbúin þegar að prjónn kemur hreinn upp úr kökunni, sé honum potað í hana miðja. Eins er vert að taka fram að sé ætlunin að baka í tveimur hringlaga formum er baksturstíminn ca. 25 mín.

Uppáhaldið mitt við undirbúning þessarar köku er að það er algjör óþarfi að nota hrærivélina. Eins og ég elska mína Kitchenaid er afskaplega ljúft að gefa henni frí stöku sinnum.

Súkkulaðiglassúr

  • 100 gr smjör, brætt
  • 220 gr flórsykur
  • 2 msk kakó
  • 1/2 tsk vanilludropar
  • salt á hnífsoddi
  • 2 msk heitt vatn eða kaffi

Blandið saman bræddu smjöri, flórsykri, kakó, vanilludropum og salti. Blandan ætti að vera hálfþurr og kekkjótt. Bætið þá heitu vatni/kaffi saman við og hrærið þar til að blandan er glansandi og kekkjalaus. Það gæti þurft eina msk í viðbót af heitu vatni til að fá rétta áferð.

sneid af dasemd

Gerið ykkur nú greiða og bakið þessa skúffuköku – þið verðið ekki svikin!

XOXO

Stella Rún

Kökur/ Ömmumatur

Jógúrtkökur – þessar gömlu góðu

jogurtkokur

Nú verður bara að segjast eins og er að þrátt fyrir sól og sumaryl er ég búin að vera afar andlaus hér á síðunni. Í raun bara í bakstri og eldamennsku yfir höfuð. Það eru því að safnast upp beiðnir frá vinum og vandamönnum og greinilega vöntun á ýmsum gömlum og góðum uppskriftum. Kannski er það Covid, kannski bara árstíminn en fólk er duglegt að elda og baka frá grunni og taka með sér í ferðalögin. Það er náttúrulega ekkert nema frábært og mér ljúft og skylt að deila með ykkur alls konar!

Ég ætla að byrja á jógúrtkökunum klassísku sem aldrei klikka. Svo fullkomnar í nestisboxið fyrir útileguna eða á íþrótta- og ættarmótin. Við skulum þó muna að hlýða Víði og bíða með að rotta okkur saman í stórum hópum þar til þríeykið gefur leyfi. Uppskriftina fékk ég upphaflega frá Stellu ömmu en ég hef breytt henni lítillega í gegnum tíðina. Þessar kökur eru einfaldar og ljúffengar og tilvalið að leyfa litlum bökurum að aðstoð og sleikja skálina í lokin.

Jógúrtkökur

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Bakstur
Serves: 24-28 stk
Prep Time: 30 mín Cooking Time: 18 mín

Einföld og skotheld uppskrift sem gleður unga sem aldna

Ingredients

  • 5 dl sykur
  • 3 stór egg*
  • 1/2 tsk vanilludropar
  • 220 gr smjör, brætt
  • 1 dós kaffijógúrt eða 2 dl karamellujógúrt
  • 1 tsk lyftiduft
  • 1/2 tsk salt
  • 6 dl hveiti
  • 150 gr suðusúkkulaði

Instructions

1

Hitið ofninn í 180 gráður, 170 gráður ef þið notið blástur.

2

Þeytið saman sykur og egg þangað til létt og ljóst.

3

Bætið vanilludropum, smjöri og jógúrt saman við og blandið vel.

4

Bætið lyftidufti, salti og hveiti í skálina og blandið varlega.

5

Saxið suðusúkkulaði og bætið saman við deigið.

6

Skiptið deiginu jafnt í 24-28 möffinsform, allt eftir stærð formanna.

7

Bakið í 15-18 mín eða þar til kökurnar eru orðnar gullinbrúnar að ofan og þær bakaðar í gegn.

Notes

*ef eggin eru lítil má setja 3 egg og 1 rauðu. Þá komum við í veg fyrir að kökurnar verði þurrar.

Thumbs up
Smakkarinn gefur þessum kökum hæstu mögulegu einkunn!

Vonandi gefið þið þessum ljúffengu möffinskökum séns og bakið með börnunum um helgina – notaleg samvera fyrir alla.

XOXO

Stella Rún

Hagnýt ráð/ Sætir molar/ Skreytingar og veisluhugmyndir

Sörur á einfaldan máta

sorur a diski

Sörur eru þær smákökur sem einhvern veginn hringja inn jólin. Ég elska að sitja og dunda við þessar fínlegu smákökur, einhvers konar æfing í núvitund. Ég hef bakað þær nokkrar í gegnum tíðina og prófað nokkrar uppskriftir. Þar sem að ég er alltaf að leita leiða til að einfalda lífið var ég svo glöð þegar ég rakst á uppskriftina hjá www.ljufmeti.com. Það sem heillaði hvað mest var að sú uppskrift krafðist þess ekki að maður sjóði saman vatn og sykur fyrir kremið heldur er notast við sýróp. Þetta er því sú uppskrift sem ég hef notað allar götur síðan. Ég hef gert nokkrar breytingar því smekkur manna er jú misjafn. Ég vil t.d. hafa kremið í sætara lagi og nota meira sýróp en í upprunalegu uppskriftinni. Einnig hef ég prófað að nota til helminga kakó og kakómalt í kremið sem mér finnst gefa einstaklega gott bragð.

Einfaldar sörur

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Serves: ca. 50 stk
Cooking Time: 15 mín

Eins og áður kom fram er þessi uppskrift upprunalega frá www.ljufmeti.com en með smávægilegum breytingum.

Ingredients

  • 3 eggjahvítur
  • salt á hnífsoddi
  • 200 gr möndlumjöl
  • 180 gr flórsykur
  • 6 eggjarauður
  • 150 ml sýróp, velgt
  • 300 gr smjör, mjúkt
  • 2 tsk instant kaffi, leyst upp í 50 ml af heitu vatni
  • 3 msk kakó
  • 1-2 msk kakómalt (má sleppa)
  • 300 gr suðusúkkulaði, e.t.v. meira

Instructions

1

Hitið ofninn í 180 gráður, undir/yfir

2

Þeytið eggjahvítur og salt þar til eggjahvíturnar eru alveg stífþeyttar og hægt er að hvolfa skálinni án þess að nokkuð sullist.

3

Sigtið saman möndlumjöl og flórsykur.

4

Blandið sigtaðri möndlublöndunni varlega saman við eggjahvíturnar þar til að nokkuð þéttur massi hefur myndast.

5

Setjið deigið í sprautupoka með stórum hringlaga stút. Þetta er ekki nauðsynlegt en góð leið til að fá botnana jafna og fallega.

6

Sprautið deiginu á sílikon makkarónumottur eða bökunarpappír og sprautið deiginu í litla hringi.

7

Sléttið úr toppum sem gætu hafa myndast á botnunum með því að dýfa fingri í vatn og strjúka yfir toppinn. Þetta skref er ekki heldur nauðsynlegt en fagurfræðilega gott.

8

Bakið botnana í miðjum ofni í 15 mín.

9

Útbúið kremið.

10

Þeytið eggjarauður þar til ljósar og þykkar.

11

Hitið sýróp í örbylgju í ca 60 sekúndur.

12

Hellið sýrópinu í mjórri bunu út í eggjarauðurnar á meðan hrærivélin gengur.

13

Skiptið mjúku smjörinu í þrennt og bætið út í eggjarauðurnar. Krem ætti að myndast og vera orðið glansandi þegar að smjörið er allt komið út í.

14

Bætið þá 2-3 tsk af instant kaffinu, kakóinu og kakómaltinu saman við. Hrærið þar til allt er vel komið saman.

15

Smakkið til. Það gæti þurft aðeins meira kaffi, kakó eða kakómalt.

16

Smyrjið mjúki kreminu á sörurnar með teskeið og kælið vel.

17

Bræðið suðusúkkulaði yfir vatnsbaði.

18

Dýfið köldum sörunum í bráðið súkkulaðið þannig að kremið sé hulið.

19

Njótið með góðum kaffibolla (er mér sagt - ég drekk ekki kaffi)

Notes

Mér finnst varla taka því að byrja á þessum bakstri ætli maður ekki að gera a.m.k. tvöfalda uppskrift. 1 og hálf uppskrift af kreminu dugar vel fyrir tvöfalda uppskrift af botnum. Ég nota bæði kakó og kakómalt til að fá aðeins mildara og sætara bragð af kreminu en það er algjört smekksatriði. Ef að kremið virðist ætla að skilja sig eða ef áferðin er hálf kekkjótt má bæta smá smjöri saman við eða kæla kremið í smástund og hræra upp í því á ný.

Þið verðið ekki svikin af þessum sörum!

XOXO

Stella Rún

Kökur/ Skreytingar og veisluhugmyndir

„Hummingbird“ kaka – beint frá Suðurríkjunum

Hummingbird kaka med kaffinu

Ef það er einhver kaka sem ég á erfitt með að standast er það góð gulrótakaka. Það er eitthvað við kryddaða, mjúka botnana og ómótstæðilegt rjómaostakremið sem ég fell alltaf fyrir. Ég á einmitt frábæra uppskrift að gulrótaköku sem þið getið fundið hér.

En þessi færsla er ekki um gulrótaköku heldur náskyldan ættingja sem ég rakst á á flakki mínu um bandarísk matarblogg (iðja sem ég stunda mjög reglulega). Samkvæmt Google vini mínum er uppskriftin upprunalega frá Jamaica en þaðan hefur hún svo borist til Suðurríkja Bandaríkjanna. Þar náði hún gríðarlegum vinsældum og er mest lesna uppskrift Southern Living Magazine frá upphafi. Ég hef ekki fundið íslenskt heiti yfir þessa köku en ætli við getum ekki kallað hana kryddaða bananaköku eða leyft okkur hreinlega að sletta smávegis og kalla hana sínu rétta nafni, „hummingbird“ kaka. Í raun er uppskrift þessi svo náskyld gulrótaköku að í aðalatriðum er bara búið að skipta út gulrótum fyrir stappaða banana. Ef þið elskið gulrótaköku og bananabrauð jafnmikið og ég að þá er ég viss um að þið munið elska þessa köku!

Hummingbird kaka

1 Star2 Stars3 Stars4 Stars5 Stars (No Ratings Yet)
Loading...

Ingredients

  • 3 bollar hveiti
  • 1 tsk kanill
  • 1 1/2 tsk salt
  • 1/2 tsk múskat
  • 1 tsk matarsódi
  • 3 egg, pískuð saman
  • 1 1/2 bolli sykur
  • 1 1/3 bolli bragðlítil olía
  • 1/4 bolli AB mjólk
  • 2 tsk vanilludropar
  • 4 vel þroskaðir bananar, stappaðir
  • 1 dós kurlaður ananas
  • 1 bolli pekanhnetur, smátt skornar

Instructions

1

Hitið ofninn í 180 gráður (ég nota undir/yfir stillinguna).

2

Smyrjið þrjú 20 cm kökuform og setjið bökunarpappír í botninn. Þetta tryggir það að kakan losni auðveldlega frá forminu í heilu lagi.

3

Blandið hveiti, kanil, salti, múskati og matarsóda saman í stórri skál.

4

Bætið eggjum, sykri, olíu, AB mjólk og vanilludropum í skálina og blandið þar til öll hráefni eru komin saman. Varist að hræra of mikið.

5

Skiptið deginu jafnt í formin þrjú og bakið í miðjum ofni í 25-30 mínútur.

Rjómaostakrem:

  • 230 g smjör við stofuhita
  • 230 g rjómaostur við stofuhita
  • 700 g flórsykur
  • 2 tsk vanilludropar
  • 1 tsk salt

Setjið öll hráefni í hrærivélarskál. Mér finnst óþarfi að þeyta smjörið eitt og sér áður en öðrum hráefnum er bætt út í. Gætið þó að hræra mjög hægt til að byrja með svo flórsykurinn fari ekki út um allt. Aukið hraðann og hrærið í 5-7 mínútur eða þangað til að kremið er orðið létt og ljóst.

Kokusneid og blom
Falleg kaka og falleg blóm

Þegar að botnarnir hafa kólnað er óhætt að setja kökuna saman og smyrja hana með kremi. Ég ákvað að stytta mér aðeins leið í þetta skiptið, enda gestirnir mættir, og setja kremið aðeins á milli laga og ofan á kökuna. Það kom bara vel út en auðvitað hefði verið hægt að smyrja hliðarnar líka.

XOXO

Stella Rún

Kökur/ Ömmumatur

Hjónabandssæla – sú allra besta

hjonabandssaela i sol

Það er ein kaka sem pabbi minn bakar blindandi og það er hjónabandssæla. Ég á margar æskuminningar þar sem að pabbi hrærði í hjónabandssælu með engum fyrirvara. Hann þurfti ekki einu sinni uppskrift!

Það eru líklega margar fjölskylduuppskriftir af hjónabandssælu í umferð en sú sem hefur þróast með mér er sú allra besta sem ég hef bragðað. Það gæti haft eitthvað með allt smjörið að gera. Það er allt einhvern veginn aðeins betra með miklu smjöri. Já eða púðursykurinn. Hann gefur smá svona karamellubragð sem er alveg ómótstæðilegt.

hjonabandssaela rett adur en hun for i ofninn
Rétt áður en sælan fór í ofninn – smá subbulegt en lofar góðu

Nú þegar að sumarið er komið og fótboltamótin og fjallgöngurnar byrjaðar er tilvalið að skella í hjónabandssælu enda geymist hún vel í þéttu, lokuðu íláti. Stútfull af höfrum, smjöri og rabarbarasultu gefur hún litlum boltasnillingum og göngugörpum mikla og góða orku. Svo er hún líka ómótstæðileg volg úr ofninum með rjómaslettu á toppnum.

Hjónabandssæla

1 Star2 Stars3 Stars4 Stars5 Stars (14 votes, average: 4,64 out of 5)
Loading...
Kökur
Prep Time: 10-15 mín Cooking Time: 35-40 mín Total Time: 45-55 mín

Gamaldags kaka sem stendur alltaf fyrir sínu.

Ingredients

  • 3 bollar haframjöl
  • 2 bollar hveiti
  • 2 bollar púðursykur
  • 1 tsk lyftiduft
  • 1/2 tsk salt
  • 250 g smjör, mjúkt
  • 1-2 msk mjólk
  • 1 lítil krukka (ca 300 g) rabarbarasulta

Instructions

1

Hitið ofninn í 180 gráður og smyrjið skúffukökuform ríkulega með smjöri.

2

Blandið öllum hráefnum (fyrir utan sultuna) saman í þokkalega stórri skál. Best er að nota sleif og fingurnar til skiptis og varist að hræra of mikið. Það er algjör óþarfi að taka fram hrærivélina fyrir þessa köku.

3

Takið rúmlega helming af deiginu og þjappið því létt í formið. Látið þá sultuna yfir og myljið restina af deiginu ofan á.

4

Bakið við 35-40 mín eða þangað til kakan hefur fengið á sig brúnan lit. Mín skoðun er sú að kakan eigi að vera mjög mjúk svo ég tek hana út áður en hún verður almennilega brún alls staðar. Þá eru kantarnir aðeins stökkir og restin mjúk og pínu klesst, eins girnilega og það hljómar. Þeir sem vilja hafa meira stökkt og minna klesst hafa kökuna aðeins lengur inni í ofninum.

Notes

*Ég hef prófað að nota spelt í stað hveitis og það kemur mjög vel út. Eins er gott að nota hveiti og heilhveiti til helminga eða jafnvel hveiti og brauðhveiti. Það má í raun nota það mjöl sem manni finnst best. Útkoman mun alltaf vera dásamlega góð hjónabandssæla.

Hvet ykkur eindregið til að gefa þessari séns – hún svíkur sko engan!

XOXO

Stella Rún

Brauð og gerbakstur

Dúnmjúkar brauðbollur

mjukar braudbollur

Það er orðið talsvert langt síðan ég lofaði ykkur uppskriftinni af þessum einstaklega mjúku og góðu brauðbollum. Það er svo fljótlegt og einfalt að skella í þessar og þær eru frábærar á brunch borðið eða sem meðlæti með góðri súpu

Dúnmjúkar brauðbollur

1 Star2 Stars3 Stars4 Stars5 Stars (11 votes, average: 3,27 out of 5)
Loading...
Brauð og gerbakstur
Serves: 18-20 stk
Prep Time: 60 mín Cooking Time: 20 mín Total Time: 1 klst 20 mín

Ingredients

  • 160 gr smjör
  • 5 dl mjólk
  • 2 tsk sykur
  • 1 bréf þurrger
  • 2 tsk salt
  • 750 gr brauðhveiti (í bláu pokunum)
  • Egg, til penslunar
  • Fræblanda eftir smekk

Instructions

1

Hitið saman mjólk og smjör þar til að smjörið er bráðið. Varist að hita of mikið til að passa upp á gerið.

2

Bætið sykri og geri út í mjólkurblönduna og hrærið lítillega. Leyfið að standa í 5 mín þar til að gerið er farið að freyða.

3

Bætið nú salti og hveiti saman við mjólkurblönduna og hnoðið saman í hrærivél eða í höndunum í nokkrar mín.

4

Leyfið deiginu að hefast undir rökum klút í 45 mín.

5

Hitið ofninn í 190 gráður, undir-yfir hita.

6

Mótið bollur úr deiginu og raðið þeim þétt saman á bökunarplötu klædda bökunarpappír. Ef deigið er of klístrað til að móta bollur þarf að hnoða upp úr smávegis auka hveiti.

7

Penslið með þeyttu eggi og dreifið fræjum yfir bollurnar.

8

Bakið í 18-22 mín eða þar til bollurnar eru fallega gullinbrúnar.

Notes

Ef að gerið freyðir ekki í mjólkurblöndunni þýðir það að eitthvað hafi komið fyrir gerið. E.t.v. hefur blandan verið of heit og gerið því eyðilagst. Ekki láta á blönduna reyna, deigið mun ekki hefa sig. Best er að byrja bara uppá nýtt, enda enginn stórskaði skeður. Best er að deigið sé dálítið klístrað en þannig verða bollurnar mýkstar Ég nota persónulega ekki blástursstillinguna á ofninum í gerbakstri. Mér finnst allt verða frekar þurrt á blæstrinum og það er fátt eins óspennandi og þurrt bakkelsi.

XOXO

Stella Rún