Browsing Tag:

einfalt

Afgangar/ Hversdagsmatur/ Morgunmatur/brunch

“Crustless quiche” eggjakaka úr alls konar

quiche i brunch

Það er fátt leiðinlegra en að þurfa að henda mat. Þó að ég reyni eftir fremsta megni að vera útsjónarsöm og nýtin fer alltaf eitthvað í tunnuna í hverjum mánuði. Ég á þó nokkra rétti í bakhöndinni sem geta bjargað heilmiklu en eru á sama tíma afskaplega bragðgóðir. Þetta “quiche” eða eggjakaka er einmitt einn af þessum réttum. Það eina sem er dálítið erfitt við að birta svona afgangauppskriftir er að nákvæm uppskrift er eiginlega ekki til. Þið verðið því að vera óhrædd við að breyta og bæta og aðlaga ykkar smekk og birgðastöðu.

Ég set “quiche” í gæsalappir þar sem að fyrirmyndin er hin franska baka, smjördeig með eggjafyllingu en ég kýs að sleppa smjördeiginu. Eggjakakan verður um leið talsvert hollari og á mínu heimili saknar enginn smjördeigsins. Fyrir þá sem að borða ekki kjöt má að sjálfsögðu sleppa öllu kjötkyns. Það er hins vegar afskaplega gott að henda afgangs beikoni eða öðru kjötáleggi með á pönnuna. Hér er allt leyfilegt.

1 Star2 Stars3 Stars4 Stars5 Stars (No Ratings Yet)
Loading...
Brunch
Serves: 6-8
Prep Time: 20-30 mín Cooking Time: 25-30 mín Total Time: 1 klst

Besta leiðin til að nýta grænmetið sem komið er á síðasta snúning og afganginn af kjötálegginu. Kjötinu má að sjálfsögðu sleppa og er þá útkoman hinn fínasti grænmetisréttur.

Ingredients

  • 1-2 msk olía
  • 1 laukur
  • 2-3 gulrætur
  • 1/2 sæt kartafla
  • 1/2 rauð paprika
  • 1/3 blómkálshaus
  • 1/3 brokkolíhaus
  • Hvítkál
  • Beikon eða skinka
  • 8-10 egg, fer eftir stærð eggjanna og fjölda þeirra sem eiga að njóta
  • 1-2 dl matreiðslurjómi
  • Rifinn ostur
  • Rifinn parmesan eða annar góður ostur
  • Salt og pipar, ég notaði Herbamare salt

Instructions

1

Skerið grænmetið sem þið kjósið að nota í hæfilega bita.

2

Steikið grænmetið á pönnu sem fara má í ofn.* Gott að byrja á lauknum og gulrótunum. Ég geymi svo yfirleitt blómkálið og brokkolíið aðeins og bæti við seinna í ferlinu.

3

Skerið kjötáleggið frekar smátt og bætið á pönnuna.

4

Bætið blómkálinu og brokkolíinu saman við og leyfið öllu að steikjast saman og mýkjast.

5

Pískið saman eggin í miðlungsstórri skál og bætið rjómanum saman við.

6

Kryddið vel með salti og pipar og hærið.

7

Rífið niður ostinn og hrærið saman við eggjablönduna.

8

Hellið eggjablöndunni yfir pönnuna og passið að osturinn dreifist nokkuð jafnt yfir allt.

9

Setjið pönnuna inn í 190 gráðu heitan ofninn og bakið þar til að eggjakakan er gullinbrún og elduð í gegn.

10

Berið fram með fersku salati og góðu brauði.

Notes

*Ef þið eigið ekki pönnu sem má fara beint í ofninn er ekkert mál að skella grænmetisblöndunni í eldfast mót og eggjahrærunni þar yfir. Passið bara að því stærra sem fatið er því styttri tíma tekur að baka eggjakökuna.

XOXO

Stella Rún

Hversdagsmatur/ Ömmumatur

Gamaldags lambabógur í tómatsoði

lambabogur m graenmeti og kartoflumus

Janúar er vinsæll mánuður til að taka fjármálin fastari tökum. Við hér á heimilinu erum þar engin undantekning og því er ég alltaf í leit að einföldum og ódýrum réttum. Þeir verða þó að vera bragðgóðir og ekki verra ef þeir eru einnig hollir og góðir fyrir litla og stóra kroppa. Við eigum yfirleitt til lambabóg í frystikistunni en það er ódýr en góður biti og dugar okkur vel í eina máltíð og hádegismat daginn eftir.

Ég var ekki í stuði fyrir lambakjöt eins og við gerum svo oft, kryddað með salti og pipar og eldað eftir hitamælinum. Mig langaði í eitthvað aðeins öðruvísi og gamli ítalski kjötrétturinn sem Sæunn amma gerði svo oft var fyrirmyndin. Það kannast eflaust margir við ítalska kjötréttinn sem ég minnist hér á. Þar er súpukjöt eldað í langan tíma í soði bragðbættu með tómatpúrru. Úr verður kraftmikill réttur sem er fullkominn með þykkri kartöflumús.

Lambabógur í tómatsoði

1 Star2 Stars3 Stars4 Stars5 Stars (No Ratings Yet)
Loading...

Fullkominn með þykkri kartöflumús með mátulega mikið af kekkjum.

Ingredients

  • 1 lambabógur ca 1,5 kg
  • 3 msk olía
  • Nokkrar smjörklípur
  • 500 ml vatn
  • Kjötkraftur
  • 1 lítil dós tómatpúrra
  • 1 askja sveppir
  • 2 laukar
  • 3 hvítlauksrif
  • 4-5 gulrætur
  • Krydd eftir smekk, ég var með rósmarín
  • Salt og pipar
  • 1-2 dósir hakkaðir tómatar
  • 1/2 blómkálshaus
  • Brokkolí eftir smekk

Instructions

1

Hitið ofninn í 180-200 gr eftir því hversu lengi bógurinn á að malla. Ég hafði ca 3 klukkutíma og hafði ofninn 180 gráðu heitan.

2

Skerið sveppi, lauk og gulrætur gróflega og setjið í botninn á ílöngum steikarpotti.

3

Rífið eða merjið hvítlauksrifin og blandið við grænmetið. Hellið olíu yfir og saltið lítillega og piprið.

4

Sjóðið vatnið og bætið út í kjötkraftinum og tómatpúrrunni. Hrærið. Ég var með tvær matskeiðar af Oskar nautakrafti í minni blöndu en það er smekksatriði hversu mikið bragð á að koma af kraftinum.

5

Kryddið lambabóginn með salti og pipar og leggið hann svo ofan á grænmetið í steikarpottinum.

6

Leggið rósmarínið meðfram kjötinu og klípið smá smjör yfir, nokkrar klípur á víð og dreif (má sleppa).

7

Hellið tómatsoðinu yfir allt saman sem og tómötunum í dósunum. Ég var aðeins með eina dós í þetta skiptið en það hefði líklega verið gott að hafa þær tvær. Smekksatriði samt sem áður.

8

Setjið lokið á pottinn og inn í ofn. Leyfið að malla í 2 klst.

9

Takið pottinn úr ofninum og bætið blómkálinu og brokkolíinu saman við.

10

Setjið lokið á pottinn og leyfið að malla í 20-30 mín til viðbótar.

11

Hækkið hitann á ofninum í 200 gráður, takið lokið af pottinum og setjið bóginn inn í 15 mín en þá ætti hann að hafa brúnast aðeins að ofan.

12

Takið bóginn úr pottinum og leyfið að hvíla um stund.

13

Sigtið grænmetið frá soðinu og berið fram í sér fati.

14

Berið fram með kartöflumús og sigtuðu tómatsoðinu.

Notes

Grænmetið sem ég setti í réttinn í þetta skiptið var það grænmeti sem ég átti til. Ég skaust ekki sérstaklega eftir neinu og er í raun að reyna að fækka búðarferðum eins og mögulega hægt er. Það hefði verið mjög gott að hafa sellerí, rauðlauk, eggaldin eða sætar kartöflur með eða í staðinn fyrir eitthvað annað. Um að gera að nýta það sem er til og minnka matarsóun.

Mikil nostalgía í þessum rétti en hann bragðaðist dásamlega með einfaldri kartöflumús og nóg af soði. Grænmetið hafði dregið í sig allt góða bragðið og bráðnaði í munni. Það borðuðu allir vel hér, hvort sem um ræddi 3 ára gamla dóttur mína eða áttræða ömmuna. Allir saddir og sælir!

XOXO

Stella Rún

Sætir molar/ Skreytingar og veisluhugmyndir

Rocky Road nammibitar – hættulega góðir

rocky road i dunk

Þessi jólin var meira um heimagerðar gjafir en oft áður. Það vantar einhvern veginn engan neitt og þá finnst mér bráðsniðugt að búa til eitthvað sem fer bara upp í munn og ofan í maga. Sörurnar eru skemmtileg gjöf en það er líka gaman að útbúa gómsæta nammibita sem hægt er að bera fram í skálum og njóta með fjölskyldunni.

Rocky Road nammibitar eru hættulega góðir. Ég hef séð margar útfærslur og það er í raun skemmtilegt að setja í blönduna það sem manni sjálfum finnst best. Ég er t.d. lítill aðdáandi jarðhneta og sleppi þeim því og hef tvöfaldan skammt af kasjúhnetum í staðinn. Annars vegar ristaðar og saltaðar og svo hreinar án viðbóta. Ég hef séð uppskriftir þar sem að Lindu buff er notað í stað sykurpúða og þar sem að döðlum er laumað með. Um að gera að láta ímyndunaraflið ráða enda ekkert heilagt í þessum Rocky Road málum.

Rocky Road nammi

1 Star2 Stars3 Stars4 Stars5 Stars (No Ratings Yet)
Loading...
Nammi
Prep Time: 30 mín Total Time: 1 klst og 30 mín

Einfalt og gott sælgæti sem er gott að gefa, himneskt að njóta.

Ingredients

  • 1 poki litlir sykurpúðar, fást t.d. í Söstrene Grene
  • 150 gr kasjúhnetur, saltaðar og ristaðar
  • 150 gr kasjúhnetur eða kasjúbrot
  • 360 gr eða 3 pokar Dumle karamellur
  • 900 gr suðusúkkulaði, e.t.v. meira

Instructions

1

Skerið Dumle karamellur í 3-4 bita og saxið hnetur miðlungsgróft.

2

Blandið saman í skál sykurpúðum, karamellum og hnetum.

3

Bræðið yfir vatnsbaði suðusúkkulaðið.

4

Hellið suðusúkkulaðinu yfir sykurpúðana, karamellurnar og hneturnar. Það gæti verið að þið þyrftuð að bræða 1-2 aukaplötur af suðusúkkulaði til að ná að hjúpa allt saman vel.

5

Setjið bökunarpappír í stórt eldfast mót og hellið blöndunni í mótið.

6

Þjappið namminu vel í mótið og kælið.

7

Skerið í munnbitastærð og njótið!

8

Geymist í kæli eða frysti.

Notes

Þetta er frekar stór uppskrift en að sjálfsögðu hægt að helminga ef nammið er hugsað til einkanota. Eða eiga bara nóg til, þetta geymist vel í frysti. Ég skar þetta allt saman niður og deildi í poka og dúnka og laumaði með í jólapakkana.

Jólin eru ekki búin – um að gera að henda í einn skammt af þessum gómsætu nammibitum!

XOXO

Stella Rún

Drykkir/ Meðlæti/ Morgunmatur/brunch/ Ömmumatur

Óveðurskakó

kako og pipakokur

Það má með sanni segja að veðurguðirninr hafi minnt á sig í liðinni viku. Þó að við höfum ekki fundið fyrir miklum veðurofsa í Kópavogsdalnum höfðu alls ekki allir Íslendingar sömu sögu að segja. Það eru margir sem eiga um sárt að binda enda eignatjón og tilfinningatjón töluvert víða um land. Þó að matur sé kannski ekki græðandi í eiginlegum skilningi getur hann veitt huggun og öryggi. Þegar það er kalt úti og vindurinn gnauðar hugsa ég alveg ósjálfrátt rjúkandi bolla af heitu kakói.

Ég hef alltaf átt smá erfitt með heita drykki, finnst þeir einfaldlega ekkert sérstaklega góðir. Heitt súkkulaði sem er lagað úr mjólk og súkkulaði eingöngu finnst mér alltaf svolítið yfirþyrmandi. Því er tilvalið að blanda saman heitu kakó og heitu súkkulaði með smá tvisti og fá þannig hinn fullkomna súkkulaðidrykk. Það er svo algjör lúxus að hafa þeyttan rjóma og jafnvel súkkulaðispæni ofan á.

Heitt súkkulaðikakó

1 Star2 Stars3 Stars4 Stars5 Stars (1 votes, average: 5.00 out of 5)
Loading...
Serves: 6-8 bollar
Cooking Time: 20-30 mín

Blanda af heitu kakó og heitu súkkulaði. Hinn fullkomni óveðursdrykkur eða bara til að njóta eftir langan dag á snjóþotu.

Ingredients

  • 2 msk kakó, helst dökkt
  • 3 msk strásykur
  • 1 tsk salt
  • 2 dl vatn
  • 100 gr suðusúkkulaði
  • 1,5 l mjólk - ég nota nýmjólk
  • 30 gr smjör

Instructions

1

Byrjið á að sjóða saman kakó, sykur, salt og vatn.

2

Bætið súkkulaðinu saman við og látið bráðna og hitna vel en ekki sjóða.

3

Bætið mjólkinni saman við í ca þremur skömmtum og látið hitna að suðu eftir hvern skammt.

4

Þegar að mjólkin er öll komin saman við og kakóið orðið snarpheitt skal slökkva undir og bæta einni vænni smjörklipu saman við.

5

Hellið í bolla og setjið rjóma og e.t.v súkkulaðispæni eða sykurpúða á toppinn.

Notes

Þessa uppskrift má leika sér endalaust með. Það má skipta venjulegu suðusúkkulaði út fyrir piparmyntusuðusúkkulaði og mylja bismarck brjóstsykur yfir. Þá er komin dásamleg jólaútgáfa.

XOXO

Stella Rún

Meðlæti/ Morgunmatur/brunch/ Veislumatur

Bakaður gullostur á þrjá vegu

gullostur med sykursinnepblondu

Bakaður gullostur er tilvalinn klúbbaréttur. Einfalt að henda saman nokkrum hráefnum og inn í ofn – voilá! Þessir klárast alltaf, sama hvað klukkan er. Brunch, afmæli, kaffiboð eða kvöldsaumaklúbbur. Bráðinn gullostur, snittubrauð, Ritz kex og málið er dautt. Ég hvet ykkur eindregið til að prófa alla þrjá og velja ykkar uppáhald.

Bakaður gullostur á þrjá vegu

1 Star2 Stars3 Stars4 Stars5 Stars (No Ratings Yet)
Loading...
Klúbbaréttur
Prep Time: 5 mín Cooking Time: 30-40 mín Total Time: 35-40 mín

Gullostur er fullkominn til að bræða í ofni með einhverju gúmmelaði ofan á. Sætt og salt í bland, ómótstæðilegt með góðu snittubrauði, súrdeigsbrauði eða kexi.

Ingredients

  • 1 gullostur
  • 3 msk sætt sinnep
  • 3 msk púðursykur
  • Væn lúka kasjúhnetur (eða aðrar hnetur eftir smekk)
  • 1 gullostur
  • 4 msk sýróp (helst hlynsýróp)
  • Væn lúka saxaðar pekanhnetur
  • Rósmarín (má sleppa)
  • 1 gullostur
  • Karrý
  • 4-5 msk mango chutney
  • Væn lúka kasjúhnetur (helst saltaðar og ristaðar)

Instructions

1

Hitið ofninn í 190 gráður, undir/yfir.

2

Setjið gullost í eldfast ílát.

3

Blandið saman sinnepi og púðursykri í lítilli skál.

4

Látið sinnepsblönduna ofan á ostinn og hneturnar þar ofan á.

5

Bakið í ca. 30 mín eða þar til að osturinn er aðeins farinn að leka.

6

Setjið gullost í eldfast ílát.

7

Hellið hlynsýrópinu yfir ostinn.

8

Látið saxaðar pekanhnetur yfir ásamt rósmaríninu (má sleppa).

9

Bakið í ca. 30 mín.

10

Veltið gullostinum uppúr karríi og látið í eldfast ílát.

11

Hellið mango chutney yfir ostinn og dreifið hnetunum yfir allt saman.

12

Bakið í ca. 30 mín.

Notes

Ég vil að osturinn sé vel bráðinn þegar hann er tekinn úr ofninum en það er algjört smekksatriði. Bakið styttra fyrir fyrri harðari ost og lengur fyrir meira klístur.

XOXO

Stella Rún

Hagnýt ráð/ Sætir molar/ Skreytingar og veisluhugmyndir

Sörur á einfaldan máta

sorur a diski

Sörur eru þær smákökur sem einhvern veginn hringja inn jólin. Ég elska að sitja og dunda við þessar fínlegu smákökur, einhvers konar æfing í núvitund. Ég hef bakað þær nokkrar í gegnum tíðina og prófað nokkrar uppskriftir. Þar sem að ég er alltaf að leita leiða til að einfalda lífið var ég svo glöð þegar ég rakst á uppskriftina hjá www.ljufmeti.com. Það sem heillaði hvað mest var að sú uppskrift krafðist þess ekki að maður sjóði saman vatn og sykur fyrir kremið heldur er notast við sýróp. Þetta er því sú uppskrift sem ég hef notað allar götur síðan. Ég hef gert nokkrar breytingar því smekkur manna er jú misjafn. Ég vil t.d. hafa kremið í sætara lagi og nota meira sýróp en í upprunalegu uppskriftinni. Einnig hef ég prófað að nota til helminga kakó og kakómalt í kremið sem mér finnst gefa einstaklega gott bragð.

Einfaldar sörur

1 Star2 Stars3 Stars4 Stars5 Stars (No Ratings Yet)
Loading...
Serves: ca. 50 stk
Cooking Time: 15 mín

Eins og áður kom fram er þessi uppskrift upprunalega frá www.ljufmeti.com en með smávægilegum breytingum.

Ingredients

  • 3 eggjahvítur
  • salt á hnífsoddi
  • 200 gr möndlumjöl
  • 180 gr flórsykur
  • 6 eggjarauður
  • 150 ml sýróp, velgt
  • 300 gr smjör, mjúkt
  • 2 tsk instant kaffi, leyst upp í 50 ml af heitu vatni
  • 3 msk kakó
  • 1-2 msk kakómalt (má sleppa)
  • 300 gr suðusúkkulaði, e.t.v. meira

Instructions

1

Hitið ofninn í 180 gráður, undir/yfir

2

Þeytið eggjahvítur og salt þar til eggjahvíturnar eru alveg stífþeyttar og hægt er að hvolfa skálinni án þess að nokkuð sullist.

3

Sigtið saman möndlumjöl og flórsykur.

4

Blandið sigtaðri möndlublöndunni varlega saman við eggjahvíturnar þar til að nokkuð þéttur massi hefur myndast.

5

Setjið deigið í sprautupoka með stórum hringlaga stút. Þetta er ekki nauðsynlegt en góð leið til að fá botnana jafna og fallega.

6

Sprautið deiginu á sílikon makkarónumottur eða bökunarpappír og sprautið deiginu í litla hringi.

7

Sléttið úr toppum sem gætu hafa myndast á botnunum með því að dýfa fingri í vatn og strjúka yfir toppinn. Þetta skref er ekki heldur nauðsynlegt en fagurfræðilega gott.

8

Bakið botnana í miðjum ofni í 15 mín.

9

Útbúið kremið.

10

Þeytið eggjarauður þar til ljósar og þykkar.

11

Hitið sýróp í örbylgju í ca 60 sekúndur.

12

Hellið sýrópinu í mjórri bunu út í eggjarauðurnar á meðan hrærivélin gengur.

13

Skiptið mjúku smjörinu í þrennt og bætið út í eggjarauðurnar. Krem ætti að myndast og vera orðið glansandi þegar að smjörið er allt komið út í.

14

Bætið þá 2-3 tsk af instant kaffinu, kakóinu og kakómaltinu saman við. Hrærið þar til allt er vel komið saman.

15

Smakkið til. Það gæti þurft aðeins meira kaffi, kakó eða kakómalt.

16

Smyrjið mjúki kreminu á sörurnar með teskeið og kælið vel.

17

Bræðið suðusúkkulaði yfir vatnsbaði.

18

Dýfið köldum sörunum í bráðið súkkulaðið þannig að kremið sé hulið.

19

Njótið með góðum kaffibolla (er mér sagt - ég drekk ekki kaffi)

Notes

Mér finnst varla taka því að byrja á þessum bakstri ætli maður ekki að gera a.m.k. tvöfalda uppskrift. 1 og hálf uppskrift af kreminu dugar vel fyrir tvöfalda uppskrift af botnum. Ég nota bæði kakó og kakómalt til að fá aðeins mildara og sætara bragð af kreminu en það er algjört smekksatriði. Ef að kremið virðist ætla að skilja sig eða ef áferðin er hálf kekkjótt má bæta smá smjöri saman við eða kæla kremið í smástund og hræra upp í því á ný.

Þið verðið ekki svikin af þessum sörum!

XOXO

Stella Rún

Kökur/ Ömmumatur

Hjónabandssæla – sú allra besta

hjonabandssaela i sol

Það er ein kaka sem pabbi minn bakar blindandi og það er hjónabandssæla. Ég á margar æskuminningar þar sem að pabbi hrærði í hjónabandssælu með engum fyrirvara. Hann þurfti ekki einu sinni uppskrift!

Það eru líklega margar fjölskylduuppskriftir af hjónabandssælu í umferð en sú sem hefur þróast með mér er sú allra besta sem ég hef bragðað. Það gæti haft eitthvað með allt smjörið að gera. Það er allt einhvern veginn aðeins betra með miklu smjöri. Já eða púðursykurinn. Hann gefur smá svona karamellubragð sem er alveg ómótstæðilegt.

hjonabandssaela rett adur en hun for i ofninn
Rétt áður en sælan fór í ofninn – smá subbulegt en lofar góðu

Nú þegar að sumarið er komið og fótboltamótin og fjallgöngurnar byrjaðar er tilvalið að skella í hjónabandssælu enda geymist hún vel í þéttu, lokuðu íláti. Stútfull af höfrum, smjöri og rabarbarasultu gefur hún litlum boltasnillingum og göngugörpum mikla og góða orku. Svo er hún líka ómótstæðileg volg úr ofninum með rjómaslettu á toppnum.

Hjónabandssæla

1 Star2 Stars3 Stars4 Stars5 Stars (2 votes, average: 5.00 out of 5)
Loading...
Kökur
Prep Time: 10-15 mín Cooking Time: 35-40 mín Total Time: 45-55 mín

Gamaldags kaka sem stendur alltaf fyrir sínu.

Ingredients

  • 3 bollar haframjöl
  • 2 bollar hveiti
  • 2 bollar púðursykur
  • 1 tsk lyftiduft
  • 1/2 tsk salt
  • 250 g smjör, mjúkt
  • 1-2 msk mjólk
  • 1 lítil krukka (ca 300 g) rabarbarasulta

Instructions

1

Hitið ofninn í 180 gráður og smyrjið skúffukökuform ríkulega með smjöri.

2

Blandið öllum hráefnum (fyrir utan sultuna) saman í þokkalega stórri skál. Best er að nota sleif og fingurnar til skiptis og varist að hræra of mikið. Það er algjör óþarfi að taka fram hrærivélina fyrir þessa köku.

3

Takið rúmlega helming af deiginu og þjappið því létt í formið. Látið þá sultuna yfir og myljið restina af deiginu ofan á.

4

Bakið við 35-40 mín eða þangað til kakan hefur fengið á sig brúnan lit. Mín skoðun er sú að kakan eigi að vera mjög mjúk svo ég tek hana út áður en hún verður almennilega brún alls staðar. Þá eru kantarnir aðeins stökkir og restin mjúk og pínu klesst, eins girnilega og það hljómar. Þeir sem vilja hafa meira stökkt og minna klesst hafa kökuna aðeins lengur inni í ofninum.

Notes

*Ég hef prófað að nota spelt í stað hveitis og það kemur mjög vel út. Eins er gott að nota hveiti og heilhveiti til helminga eða jafnvel hveiti og brauðhveiti. Það má í raun nota það mjöl sem manni finnst best. Útkoman mun alltaf vera dásamlega góð hjónabandssæla.

Hvet ykkur eindregið til að gefa þessari séns – hún svíkur sko engan!

XOXO

Stella Rún

Hversdagsmatur

Mömmu lasagne

Lasagne i fati

Ég elska góðan heimilismat og er sífellt í leit að góðum uppskriftum sem falla í kramið hjá bæði litlum og stórum munnum. Lasagne er einn af þessum réttum sem öllum finnst góður. Ekki skemmir heldur fyrir hversu þægilegt og einfalt það er að útbúa ljúffengt lasagne. Uppskriftin sem ég nota oftast er í grunninn sú sem mamma gerir. Ég elskaði lasagne-ið hennar sem barn. Þetta er minn “go to” réttur þegar við höldum matarboð enda er auðvelt að útbúa mikið magn í einu og metta þannig marga með algjörri lágmarksfyrirhöfn.

Mömmu lasagne

1 Star2 Stars3 Stars4 Stars5 Stars (No Ratings Yet)
Loading...
Serves: 10
Prep Time: 1 klst Cooking Time: 30-40 mín Total Time: 1 klst 40 mín

Þetta er stór uppskrift - passar í stærstu gerð af fati hér hjá mér og mettar leikandi 10 fullorðna, jafnvel fleiri.

Ingredients

  • 2 msk olía
  • 400-500 g nautahakk
  • 1 laukur
  • 1 rauðlaukur
  • 350 g rifnar gulrætur
  • 3 hvítlauksgeirar
  • 70 g tómatpúrra, e.t.v. meira
  • 2 teningar nautakraftur
  • 1 dl vatn
  • 1 dós hakkaðir tómatar, ég nota með basil og oregano
  • Stór krukka eða dós pastasósa
  • 1 poki spínat - má sleppa
  • 3 msk tómatsósa
  • Salt og pipar eftir smekk
  • 1 stór og 1 lítil dós kotasæla
  • 2-3 dósir sýrður rjómi, 10%
  • Parmesan ostur
  • Rifinn ostur

Instructions

1

Byrjið á að rífa gulrætur og saxa laukana smátt. Steikið í olíunni þangað til að laukurinn er orðinn glær. Bætið þá hvítlauksgeirunum á pönnuna og blandið vel.

2

Látið hakkið út á pönnuna og steikið í gegn. Blandið saman við tómatpúrrunni, nautakraftinum og vatninu og leyfið öllu að koma vel saman á pönnunni. Saltið og piprið.

3

Bætið nú hökkuðu tómötunum og pastasósunni á pönnuna og setjið heilan poka af spínati saman við. Þegar hér er komið við sögu lítur út fyrir að allt muni sjóða uppúr en gefið þessu nokkrar mínútur. Spínatið mun hverfa í sósunni.

4

Leyfið kjötsósunni að malla eins lengi og hægt er eða a.m.k. á meðan hvíta sósan er útbúin.

5

Ég geri ekki hefðbundna hvíta sósu einfaldlega af því að mér finnst mín útgáfa betri. Svo nenni ég ekki að gera bechamel sósu. Ég notast við blöndu af kotasælu, sýrðum rjóma og parmesan. Mér finnst lasagne-ið verða léttara með þessari sósu, einhvern veginn ekki eins þungt í maga.

6

Hrærið saman kotasælu og sýrðum rjóma í stórri skál og rífið út í vænan bita af parmesan.

7

Nú er komið að því að raða öllu góðgætinu í fatið! Byrjið á að setja smá kjötsósu í botninn og raðið lasagne-plötum ofan á. Smyrjið þá vel af hvítu sósunni yfir plöturnar og kjötsósu yfir þannig að hún þeki allt saman. Endurtakið þar til bæði hvíta sósan og kjötsósan eru uppurnar. Dreifið vel af rifnum osti yfir og til að fá extra gott bragð er gott að rífa smá parmesan ost yfir líka.

8

Bakið í 180 gráðu heitum ofni í 30-35 mínútur eða þangað til að osturinn er orðinn gullinbrúnn.

Notes

Spínatinu má vel sleppa og breytir það engu varðandi bragðið. Mér finnst hins vegar gott að "lauma" eins miklu grænmeti og hægt er í fatið. Það er eitt varðandi hvítu sósuna - stundum finnst mér fullmikið að kaupa allar þessar dósir af kotasælu og sýrðum rjóma. Þá læt ég oft duga að kaupa eina stóra dós af kotasælu og nota svo það sem til er heima saman við. Ég hef notað bæði AB mjólk og gríska jógúrt og hefur bæði komið mjög vel út. Þetta sparar manni líka heilmikil innkaup án þess að koma niður á bragðinu!

Nú til dags eru margir að reyna að minnka kjötneyslu. Við fjölskyldan erum þar engin undantekning. Ég hef því minnkað magnið af hakki sem ég nota í þessa uppskrift um helming en það kemur ekkert niður á bragðinu. Auðvitað mætti sleppa kjötinu alveg og útbúa grænmetislasagne en mér finnst eitthvað notalegt við kjötsósuna sem fær að malla í rólegheitum og gefur svo gott bragð. Grænmetislasagne-ið fær bara sína eigin færslu síðar enda gómsætur réttur sem stendur alveg einn og sér.

lasagne a diski
Nauðsynlegt að hafa gott salat til hliðar

Eitt smá tips að lokum. Ef þið hafið tök á að útbúa lasagne-ið kvöldinu áður eða í hádeginu þann daginn sem þið berið það fram fáið þið bæði bragðmeiri og safaríkari rétt. Þetta er að sjálfsögðu ekki nauðsynlegt skref en eitthvað sem er vert að prófa einn frostkaldan laugardaginn. Þessi réttur er uppáhald hér á heimilinu og víðar!

XOXO

Stella Rún

Kökur/ Skreytingar og veisluhugmyndir

SúkkulaðikakAN með greini

sukkuladikaka m sprinkles

Ef ég þyrfti að velja eina köku til að baka út lífið að þá yrði það þessi kaka. Hún er einföld, sjúklega góð og þægileg að skreyta. Þessi kaka helst mjúk og góð í marga daga og er tilvalin sem skúffukaka í þokkabót. Í einu orði sagt, hin fullkomna súkkulaðikaka – súkkulaðikakAN!

1 Star2 Stars3 Stars4 Stars5 Stars (1 votes, average: 5.00 out of 5)
Loading...
Kökur
Prep Time: 15 mín Cooking Time: 30-35 mín Total Time: 50 mín

Þetta deig passar fullkomlega í þrjú 20 cm bökunarform. Eigi kakan að vera hærri en þrír botnar þarf að gera eina og hálfa uppskrift. Uppskriftin passar líka vel í skúffukökuform og er í raun dásamleg sem slík.

Ingredients

  • 5 dl hveiti (270 gr)
  • 5 dl sykur (415 gr)
  • Rúmlega 1 dl kakó (80 gr)
  • 1 tsk salt
  • 1 tsk matarsódi
  • 1 tsk lyftiduft
  • 2 egg
  • 2 dl kalt vatn
  • 2 dl AB mjólk
  • 2 tsk vanilludropar
  • 200 gr brætt smjör

Instructions

1

Hitið ofninn í 170 gráður, undir/yfir.

2

Klippið út 3 hringi bökunarpappír í sömu stærð og formin.

3

Spreyið formin með bökunarspreyi (eða smyrjið þau með smjöri) og látið bökunarpappír í botninn.

4

Setjið öll þurrefnin saman í skál og blandið vel.

5

Bætið í skálina eggjum, vatni, AB mjólk og vanilludropum. Hrærið lítillega.

6

Bræðið smjörið. Ég nota yfirleitt örbylgjuofninn.

7

Látið heitt smjörið saman við deigið og hrærið vel. Það munu vera smávegis kekkir í deiginu en það kemur ekki að sök.

8

Skiptið deiginu jafnt á milli formanna þriggja.

9

Bakið í 30-35 mín eða þar til að pinni sem stungið er í kökuna miðja kemur hreinn út.

Notes

Mér finnst best að draga fram vogina fyrir þessa köku. Vigti maður innihaldsefnin fær maður alltaf sömu kökuna. Það er ekki eins nákvæmt að nota desilítramálið en dugar þó alveg. Þar sem að ofnar eru svo mismunandi finnst mér best að athuga með kökuna þegar að 5 mín eru eftir af bökunartímanum, sumsé eftir 25 mín. Ég athuga svo aftur eftir 30 mín o.s.frv.

Eins og kom fram hér að ofan er þessi kaka fullkomin til að skreyta. Hún er vissulega mjúk en ekki svo mjúk að það sé ekki hægt að stafla henni og skreyta án vandræða. Ég hef skreytt hana í ótal mismunandi útgáfum og nota þá smjörkrem. Uppskrift að súkkulaðismjörkremi með sýrópi má finna hér að neðan en það er von á sérstakri smjörkremsfærslu innan skamms sem ætti að gefa ykkur fleiri hugmyndir og meira frelsi í skreytingum.

Súkkulaðismjörkrem:

  • 250 gr mjúkt smjör
  • 500 gr flórsykur
  • 1 tsk salt
  • 1 tsk vanilludropar
  • 6-7 msk sýróp
  • 4 msk kakó
  • 1 egg (má sleppa)

Hrærið öll innihaldsaefni vel og lengi í hrærivélinni þar til að kremið er orðið létt og ljóst. Liturinn á að vera svona karamellubrúnn. Ef þið viljið henda í spariútgáfuna af þessu kremi er dásamlegt að bræða eina plötu af suðusúkkulaði og bæta út í kremið í mjórri bunu og hræra vel.

Smyrjið vel af kreminu á milli botna og þunnu lagi utan á. Þetta þunna lag köllum við “crumb coat” en það lokar inni alla mylsnu og kemur í veg fyrir að lokalagið af kreminu sé smitað af kökumylsnu. Kælið kökuna lítillega og leyfið mylsnulaginu að taka sig. Smyrjið svo að lokum vænu lagi af kremi utan og ofan á kökuna og skreytið að vild. Voilá! Fullkomin sunnudagskaka. Eða afmæliskaka. Eða bara kaka. Það er jú alltaf tilefni fyrir góða köku!

Njótið sem allra best og leyfið hugmyndafluginu að leika lausum hala í skreytingunum.

XOXO

Stella Rún

Meðlæti/ Morgunmatur/brunch

Fáránlega auðvelt döðlupestó

dodlupesto med bollum

Mér finnst ótrúlega gaman að skoða matreiðslubækur og matarblogg. Þetta er slakandi iðja og uppspretta svo margra góðra hugmynda í eldhúsinu. Eitt af mínum uppáhalds íslensku matarbloggum er www.grgs.is, Gulur, rauður, grænn og salt. Þaðan er einmitt uppskriftin af þessu einfalda döðlupestói fengin, með smávægilegum breytingum.

Einfalt döðlupestó

1 Star2 Stars3 Stars4 Stars5 Stars (No Ratings Yet)
Loading...

Látið ekki fá innihaldsefni blekkja ykkur. Þetta pestó er ótrúlega bragðmikið og gott! Tilvalið með öllu brauði og kexi en einnig fullkomið í ofnrétti með kjúklingi eða fiski.

Ingredients

  • 1 krukka rautt pestó
  • 3/4 krukka fetaostur
  • 100 gr döðlur, eða meira eftir smekk
  • 100 gr kasjúhnetur, eða meira eftir smekk

Instructions

1

Stappið saman pestó og fetaost þar til að fetaosturinn er vel blandaður saman við pestóið.

2

Saxið döðlur og hnetur frekar smátt.

3

Setjið döðlur og hnetur saman við pestóblönduna.

4

Njótið!

Notes

Magn af döðlum og kasjúhnetum fer svolítið eftir því hversu blautt þið viljið að pestóið sé. Mér finnst best að hafa það svona meðalblautt en sumir vilja frekar að það sé mjög crunchy. Þá gæti þurft að bæta við fleiri döðlum og meiri hnetum. Það má að sjálfsögðu skipta kasjúhnetunum út fyrir aðrar hnetur, allt eftir smekk hvers og eins.

Þetta döðlupestó er löngu orðið ómissandi á veisluborðið eða í brunch-inn. Tekur enga stund að útbúa en það eru einmitt bestu réttirnir, þessir sem eru einfaldir en samt svo ótrúlega gómsætir.

XOXO

Stella Rún