Browsing Category

Veislumatur

Hversdagsmatur/ Veislumatur

Risarækjupasta

risaraekjupasta

Ég þreytist ekki á því að dásama þetta veður sem við höfum fengið síðustu daga og vikur. Þó að andvarinn sé heldur kaldur er eitthvað við sólina sem lyftir andanum og gefur hlýju í hjartað. Annað sem gerist er að smekkurinn fyrir þungum pottréttum og súpum breytist og ilmurinn af léttum fiskréttum og salötum fyllir eldhúsið.

Við endurnýjuðum kynnin við risarækjur um daginn og höfum notað mikið í ýmsa rétti enda ótrúlega bragðgóðar og einfalt að matreiða. Þessi pastaréttur varð svo til við smá tiltekt í ísskápnum þar sem ég komst að því að það var til smá af þessu og hinu sem myndi fara vel með linguine pasta sem ég var spennt að prófa, frá Rummo.

Eins og svo oft áður má aðlaga þessa uppskrift að því sem er til heima hverju sinni. Svo lengi sem hráefnið er ferskt og gott verður útkoman dásamlegur pastaréttur. Svo sumarlegur með skvettu af sítrónusafa. Og svo auðvitað nóg af parmesan.

Ómótstæðilegt risarækjupasta

1 Star2 Stars3 Stars4 Stars5 Stars (No Ratings Yet)
Loading...
Serves: 4-6
Cooking Time: 30 mín

Léttur og ferskur pastaréttur sem á alltaf við en sérstaklega nú með hækkandi sól og kældu hvítvíni.

Ingredients

  • 500 gr linguine pasta
  • 400 gr stórar rækjur, hráar
  • 2 hvítlauksgeirar, marðir
  • Smjörklípa
  • Chili krydd
  • Skvetta góð ólífuolía
  • 3-4 msk grænt pestó
  • Handfylli fersk basilíka
  • Handfylli ruccola salat
  • Litlir tómatar, eftir smekk
  • Parmesan ostur
  • Sítrónusafi, helst ferskur

Instructions

1

Byrjið á að undirbúa rækjurnar. Ég var með risarækjur sem ég afþýddi með því að láta renna á þær kalt vatn í nokkrar mínútur.

2

Hitið olíu og smá smjörklípu á pönnu.

3

Bætið hvítlauknum og chilikryddinu og leyfið að hitna í gegn.

4

Steikið rækjurnar þangað til þær eru orðnar bleikar og fulleldaðar. Takið þær til hliðar og geymið ásamt vökvanum af pönnunni.

5

Sjóðið pasta skv. leiðbeiningum.* Passið að taka frá eins og 1 dl af söltu pastavatni til hliðar.

6

Hrærið saman grænu pestóinu og ólífuolíunni til að þynna pestóið.

7

Bætið við smátt saxaðri baskilíkunni.

8

Skerið tómatana í tvennt.

9

Þegar pastað er soðið skal blanda öllu saman í stórri skál. Notið svolítið af pastavatninu með pestóinu, klettasalatinu og tómötunum. Kreistið að lokum hálfa sítrónu yfir allt saman. Berið fram með auka olíu og nóg af parmesan osti.

Notes

*Ég notaði linguine frá Rummo en það pasta finnst mér haldast fullkomlega "al dente" og vera fullkomið í þennan rétt en að sjálfsögðu má nota hvaða pasta sem er.

Þetta verðið þið að prófa sem allra fyrst með sól í sinni og hvítvín í glasi!

XOXO

Stella Rún

Veislumatur

Hægeldaðir lambaskankar

lagt a bord lambaskankar

Við lifum á “fordómalausum” tímum eins og einhver orðaði það svo skemmtilega. Það er samt sem áður staðreynd að við erum að aðlaga okkur breyttum aðstæðum og ýmislegt í okkar venjum sem óhjákvæmilega breytist. Við hér í Lækjasmáranum höfum t.d. átt okkar föstu “take-away” daga. Nú eru hins vegar allir saman heima bróðurpartinn af tímanum og því tilvalið að dunda sér aðeins í eldhúsinu. Það er sem dæmi alveg tilvalið að nýta hádegishléið í vinnunni (sem fram fer heima) til þess að undirbúa kvöldmatinn sem fær svo bara að malla í rólegheitum.

Ég er búin að lúra lengi á einmitt svoleiðis uppskrift en nú er ekki eftir neinu að bíða! Hægeldaðir lambaskankar sem verða bragðmeiri og betri eftir því sem þeir fá að malla lengur. Ég hef aðeins eldað þessa skanka fyrir matarboð og er uppskriftin því frekar stór. Þeir eru þó ekki síðri daginn eftir og því frábær afgangamatur. Þeir sem búa svo vel að eiga stóra pottjárnspotta nota þá hiklaust en ég hef verið að nota stærsta stálpottinn minn.

Hægeldaðir lambaskankar

1 Star2 Stars3 Stars4 Stars5 Stars (No Ratings Yet)
Loading...
Hægeldað
Serves: 6-8
Prep Time: 30 mín Cooking Time: 5-6 klst Total Time: 6 1/2 klst

Réttur sem yljar.

Ingredients

  • 8 lambaskankar, snyrtir
  • Olía og smjör til steikingar
  • Salt og pipar
  • 2 gulir laukar
  • 1 rauðlaukur
  • 4 hvítlauksrif, marin
  • 5 stórar gulrætur
  • 4 sellerístilkar
  • 250 gr sveppir
  • 1 stór dós tómatpúrra, eða tvær litlar
  • 2 dósir hakkaðir tómatar
  • Nautakraftur, ca. 1 msk
  • 500 ml gott rauðvín + 1 glas fyrir kokkinn
  • 1 l vatn
  • 3 lárviðarlauf
  • 3 greinar rósmarín
  • 1/2 blómkálshaus
  • 1/2 brokkolíhaus

Instructions

1

Byrjið á að snyrta skankana til.

2

Steikið þá upp úr smjöri og olíu og kryddið vel með salti og pipar. Geymið skankana á fati á meðan þið steikið grænmetið.

3

Hitið ofninn í 130 gráður.

4

Bætið olíu og smjöri í pottinn og steikið laukana, hvítlauk, gulrætur, sellerí og sveppi þangað til að allt er farið að mýkjast og ilma vel. Saltið og piprið.

5

Bætið tómatpúrrunni út í og leyfið að hitna saman.

6

Setjið hökkuðu tómatana, rauðvínið, vatnið, nautakraftinn og kryddjurtirnar út í pottinn og blandið öllu vel saman.

7

Komið skönkunum fyrir svo að þeir standi aðeins uppúr soðinu og grænmetinu.

8

Setið lok á pottinn og komið honum fyrir í miðjum ofninum. Leyfið að malla í a.m.k. 4 klst.

9

Þegar 4 klst eru liðnar skuluð þið taka pottinn úr ofninum og hræra aðeins í öllu saman. Smakkið til með salti og pipar og e.t.v. aðeins meiri nautakrafti.

10

Setjið blómkálið og brokkolíið út í pottinn og leyfið því að malla með síðasta klukkutímann. Þegar ca. 30 mín eru eftir af eldunartímanum er gott að hækka hitann í 180 gráður og taka lokið af pottinum.

11

Veiðið lárviðarlaufin og rósmarínið uppúr pottinum og berið fram ásamt sætkartöflumús. Passið að ná vel af mauksoðnu grænmetinu með og nota soðið sem sósu.

12

Oooooog njóta!

Notes

Það fer aðeins eftir stærð pottsins sem notaður er hversu mikið vatn þið þurfið. Best er að byrja á 500ml-1l og sjá hvort að það dugi. Annars bæta við og bæta þá nautakrafti, salti og pipar við líka svo að bragðið haldi sér.

Lambaskankana finnst mér best að bera fram með sætkartöflumús. Uppskriftin er væntanleg hér en er í stórum dráttum sætar kartöflur stappaðar með smjöri, rjómaosti og rjóma. Og auðvitað saltað og piprað að smekk. Ég skal lofa ykkur því að það verður enginn svikinn af þessum rétti og þó að hann taki smá tíma að útbúa skilar það sér allt í ómótstæðilegu bragðinu.

XOXO

Stella Rún

Skreytingar og veisluhugmyndir/ Veislumatur

Fiskisúpan hans pabba

fiskisupa med bollu

Jólin 2019 eru engin undantekning frá fyrri árum. Það eru búnar að vera margar veislur og maður er ítrekað búinn að borða yfir sig. Allt eins og það á að vera. Það kemur hins vegar alltaf að því að maður er eiginlega búinn að borða yfir sig af jólasteikum. Pabbi sló því heldur betur í gegn í gær þegar hann bauð okkur upp á dásamlega góða fiskisúpu. Þykk og bragðmikil með nóg af góðu sjávarfangi, akkúrat það sem að maginn þráði.

Þegar ég hugsa um pabba í eldhúsinu koma alls konar fiskréttir upp í hugann enda er hann gamall sjóari alinn upp af gömlum sjóhundum og fiskverkakonu. Það var pabbi sem kenndi mér að fiskur og sjávarfang getur líka verið veislumatur. Í raun kenndi hann mér líka að fiskur getur verið algjör hversdagsmatur en við förum ekki nánar út í það hér. Súpan var hins vegar algjört sælgæti – því lofa ég!

Fiskisúpan hans pabba

1 Star2 Stars3 Stars4 Stars5 Stars (No Ratings Yet)
Loading...
Sjávarréttir
Serves: 6-8

Bragðmikil og sérlega góð fiskisúpa. Sannkallaður veislumatur án þess að vera þungt í maga.

Ingredients

  • 2 gulir laukar
  • 400 gr gulrætur
  • 100 gr smjör
  • 2 msk olía
  • 2 dósir hakkaðir tómatar
  • 100 gr rjómaostur (má sleppa en gefur gott bragð)
  • 1/2 l rjómi
  • 800 ml vatn
  • 1 flaska tasty humarkraftur
  • Salt og pipar, eftir smekk
  • 50 cl koníak
  • 800 gr þorskur
  • 800 gr bleikja
  • 1/2 kg smáhumar

Instructions

1

Laukar og gulrætur skorið smátt og látið mýkjast hægt við miðlungsháan hita í smjörinu og olíunni.

2

Því næst er tómötum, vatni, rjóma og krafti bætt út í og látið krauma vel saman. Smakkað til með salti og pipar.

3

Maukað með töfrasprota ef vill og koníakið sett saman við. Smakkað til enn og aftur.

4

Fiskurinn skorinn í munnbitastærðir og sett út í snarpheita súpuna rétt áður en hún er borin fram.

5

Borin fram með góðu brauði og e.t.v. hvítvínsglasi.

Notes

Tasty humarkraftinn hef ég séð í flestum matvörubúðum en ef hann finnst ekki er vel hægt að nota fiskikraft. Í þennan skammt af súpu þarf tvo teninga eða tvær matskeiðar af krafti.

Í raun er það sérlega viðeigandi að þessi uppskrift skuli birtast á síðunni í dag, 29. desember, en það var einmitt afmælisdagur Dodda afa sem vann á sjó alla sína tíð og elskaði allt sjávarfang. Við höfum því yfirleitt haft þann háttinn á þessa daga á milli hátíðanna að elda mikinn fisk og sjávarrétti.

Njótið vel!

XOXO

Stella Rún

Meðlæti/ Morgunmatur/brunch/ Veislumatur

Bakaður gullostur á þrjá vegu

gullostur med sykursinnepblondu

Bakaður gullostur er tilvalinn klúbbaréttur. Einfalt að henda saman nokkrum hráefnum og inn í ofn – voilá! Þessir klárast alltaf, sama hvað klukkan er. Brunch, afmæli, kaffiboð eða kvöldsaumaklúbbur. Bráðinn gullostur, snittubrauð, Ritz kex og málið er dautt. Ég hvet ykkur eindregið til að prófa alla þrjá og velja ykkar uppáhald.

Bakaður gullostur á þrjá vegu

1 Star2 Stars3 Stars4 Stars5 Stars (No Ratings Yet)
Loading...
Klúbbaréttur
Prep Time: 5 mín Cooking Time: 30-40 mín Total Time: 35-40 mín

Gullostur er fullkominn til að bræða í ofni með einhverju gúmmelaði ofan á. Sætt og salt í bland, ómótstæðilegt með góðu snittubrauði, súrdeigsbrauði eða kexi.

Ingredients

  • 1 gullostur
  • 3 msk sætt sinnep
  • 3 msk púðursykur
  • Væn lúka kasjúhnetur (eða aðrar hnetur eftir smekk)
  • 1 gullostur
  • 4 msk sýróp (helst hlynsýróp)
  • Væn lúka saxaðar pekanhnetur
  • Rósmarín (má sleppa)
  • 1 gullostur
  • Karrý
  • 4-5 msk mango chutney
  • Væn lúka kasjúhnetur (helst saltaðar og ristaðar)

Instructions

1

Hitið ofninn í 190 gráður, undir/yfir.

2

Setjið gullost í eldfast ílát.

3

Blandið saman sinnepi og púðursykri í lítilli skál.

4

Látið sinnepsblönduna ofan á ostinn og hneturnar þar ofan á.

5

Bakið í ca. 30 mín eða þar til að osturinn er aðeins farinn að leka.

6

Setjið gullost í eldfast ílát.

7

Hellið hlynsýrópinu yfir ostinn.

8

Látið saxaðar pekanhnetur yfir ásamt rósmaríninu (má sleppa).

9

Bakið í ca. 30 mín.

10

Veltið gullostinum uppúr karríi og látið í eldfast ílát.

11

Hellið mango chutney yfir ostinn og dreifið hnetunum yfir allt saman.

12

Bakið í ca. 30 mín.

Notes

Ég vil að osturinn sé vel bráðinn þegar hann er tekinn úr ofninum en það er algjört smekksatriði. Bakið styttra fyrir fyrri harðari ost og lengur fyrir meira klístur.

XOXO

Stella Rún