Browsing Category

Skreytingar og veisluhugmyndir

Kökur/ Skreytingar og veisluhugmyndir

Mjúk vanillukaka með saltkaramellukremi – páskakakan í ár!

paskakaka ad ofan

Sætasta hátíðin af þeim öllum hlýtur að vera páskarnir. Allir þessir páskaungar og kanínur, pastellitir og súkkulaði. Ég er einmitt sjúk í allt pastel og það er því tilhlökkunarefni hvert ár að útbúa páskaköku. Þetta árið varð vanillukaka fyrir valinu. Vanillukaka smurð með saltkaramellusmjörkremi með auka karamellu á milli laga – himnesk!

Uppskriftina að saltkaramellunni setti ég í „highlights“ á instagram en hún mun líka koma inná síðuna hér. Þessi saltkaramella er svo einföld og góð. Dásamleg út á ís, með ávaxtasalati, á marengs eða eintóm uppúr krukkunni – möguleikarnir eru endalausir.

En aftur að kökunni. Þessi vanillukaka er mjög mjúk, þornar ekki upp og heldur sér í marga daga. Ólíkt öðrum vanillukökubotnum sem ég hef bakað eru eggin hér notuð heil, ekki bara hvítan og verður hún mýkri og rakari fyrir vikið.

Vanillukaka með saltkaramellukremi

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Serves: 3 20 cm botnar

Dúnmjúkir botnar með ómótstæðilegu saltkaramellukremi

Ingredients

  • 2 1/2 bolli (330 gr) hveiti
  • 3 tsk lyftiduft
  • 1 tsk salt
  • 175 gr mjúkt smjör
  • 1 msk vanilludropar
  • 1 1/2 bolli (310 gr) sykur
  • 3 msk bragðlítil olía
  • 4 egg
  • 300 ml mjólk, ég notaði nýmjólk

Instructions

1

Hitið ofninn í 180, undir/yfir. Ef þið kjósið að nota blástur skuluð þið hafa ofninn í 170 gráðum.

2

Byrjið á að setja hveiti, lyftiduft og salt í skál og geymið. Það getur verið góð hugmynd að sigta saman þurrefnin en það er ekki nauðsynilegt.

3

Setjið smjör, sykur, vanilludropa og olíu í hrærivélarskál og þeytið þar til létt og ljóst. Þeir sem eiga ekki hrærivél geta notað handþeytara og frekar stóra bökunarskál.

4

Bætið eggjum við einu í einu og hrærið vel á milli.

5

Hellið ca 1/3 af þurrefnunum í hrærivélarskálina og þeytið þar til deigið er nokkuð samfellt. Hellið þá helmingnum af mjólkinni saman við og hærið. Þá 1/3 til viðbótar af þurrefnum, hinum helmingnum af mjólkinni og í lokin restinni af þurrefnunum.

6

Nú á deigið að vera miðlungsþunnt, ekki mjög þunnt en ekki heldur mjög þykkt og það gæti verið smá svona kotasæluáferð. Það er eðlilegt og bara besta mál.

7

Hellið í þrjú 20 cm form sem hafa verið smurð og klædd með bökunarpappír í botninn. Ég nota Pam sprey en það má velt nota olíu eða smjör í staðinn.

8

Bakið í miðjum ofni í 20-25 mín. Mikilvægt að fylgjast vel með þar sem ofnar eru svo mismunandi.

Notes

Ég átta mig á að það eru ekki allir sem eiga mörg bökunarform í sömu stærð. Þá er hægt að baka aðeins þykkari botna í tvennu lagi og geyma deigið bara í skálinni á meðan fyrri botninn bakast. Það er svo smekksatriði hvort þið viljið taka þykka botnana í sundur til að hafa fleiri lög eða smyrja bara tvo botna. Það er ekkert rétt eða rangt í þessu, allt saman eftir smekk.

Saltkaramellusmjörkrem:

  • 200 gr smjör, mjúkt
  • 1/2 krukka saltkaramella, 3 dl ca. Við stofuhita (má ekki vera mjög heit a.m.k.)
  • 1/2 vanilludropar
  • 300 gr flórsykur
  • 1 egg (má sleppa)

Setjið hráefnin í hrærivélarskál og hrærið allt saman þar til létt og ljóst. Það er gott að hafa viskustykki yfir hrærivélinni til að byrja með svo að flórsykurinn fari ekki út um allt, eins og gerðist hjá mér. Það er lykilatriði að leyfa vélinni að hræra í nokkrar mínútur til að fá þessa léttu áferð sem við erum að leita eftir. Það gæti verið að ykkur þætti kremið of þykkt eða þunnt en þá er um að gera að leika sér aðeins með hráefnin, bæta við saltkaramellu ef kremið er of þykkt og flórsykri ef það er of þunnt.

Þegar botnarnir eru kólnaðir og kremið klárt er kominn tími til að setja kökuna saman. Ég var með þrjá botna og setti krem og aukakaramellu á milli laga. Ég vildi ekki hafa þykkt lag af kremi utan um kökuna og reyndi að ná fram smá svona „naked cake“ útliti. Ég setti restina af kreminu í tvo sprautupoka og sprautaði smá skrauti ofan á og til hliðar og skreytti svo með súkkulaðieggjum. Þessi egg fékk ég í Hagkaup en þau voru til í tveimur stærðum og þessum afskaplega fallegu pastellitum. Fólknara var það ekki í þetta skiptið!

Sérlega sæt og góð kaka í páskabúningi sem ég hvet ykkur til að baka og njóta með ykkar nánustu – í tveggja metra fjarlægð!

XOXO

Stella Rún

Kökur/ Skreytingar og veisluhugmyndir

Súkkulaðikaka – sú allra mýksta

mjuk sukkuladikaka

Ég gæti eytt heilu dögunum í að fletta uppskriftabókum og -blöðum og skrolla í gegnum matarblogg. Sumum finnst þetta undarlegt áhugamál en ég veit að margir tengja. Aðal vandinn er svo að velja úr þær uppskriftir sem maður ætlar að láta á reynda. Ég varð forvitin þegar ég rakst á súkkulaðiköku á bandarísku bakstursbloggi sem lofaði að vera sú mýksta sem maður myndi nokkurn tíma bragða. Ég varð bara að prófa!

Þegar ég bakaði þessa köku fyrst voru tveir hlutir sem ég tók sérstaklega eftir. Annars vegar hversu þunnt deigið er áður en það er sett í ofninn og hins vegar við hversu lágan hita kakan er bökuð. Ég held þó að þetta tvennt sé einmitt galdurinn. Þetta er sú allra mýksta kaka sem ég hef bakað og bragðað. Það skal þó tekið fram að ég er aldrei með neinar æfingar við það að skreyta þessa enda þolir hún það ekki. En einfaldlega skreytt er þetta hin fullkomna helgarkaka.

Dúnmjúkur súkkulaðidraumur

1 Star2 Stars3 Stars4 Stars5 Stars (No Ratings Yet)
Loading...
Prep Time: 15 mín Cooking Time: 30 mín Total Time: 45 mín

Ingredients

  • 2 bollar hveiti (260 gr)
  • 2 bollar sykur (400 gr)
  • 3/4 bolli kakó (85 gr)
  • 1 tsk salt
  • 2 tsk matarsódi
  • 2 egg, stór
  • 1 bolli (240 ml) AB mjólk
  • 1 bolli (240 ml) olía, t.d. ISIO4 olía
  • 2 tsk vanilludropar
  • 1 bolli (240 ml) heitt vatn (eða uppáhellt kaffi)

Instructions

1

Hitið ofninn í 150 gráður, undir/yfir hita.

2

Spreyið 3 kökuform (20 cm) með olíuspreyi eða smyrjið með smá olíu. Klæðið botnana á forminu með bökunarpappír.

3

Blandið þurrefnum saman í frekar stórrin skál.

4

Blandið öllum blautu innihaldsefnunum saman (nema vatninu/kaffinu) í annarri skál.

5

Bætið nú blauta saman við þurra og hrærið vel.

6

Bætið þá heitu vatninu (helst sjóðandi) saman við. Nú er deigið orðið mjög þunnt en þannig á það einmitt að vera.

7

Bakið í miðjum ofni í ca. 30 mín.

8

Kakan er tilbúin þegar að prjónn, sem stungið er í hana miðja, kemur hreinn út.

9

Botnarnir þurfa að kólna alveg áður en hægt er að smyrja kreminu á.

Notes

Þetta deig passar í tvö 24 cm kökuform en þá gæti bökunartíminn breyst.

Kremið sem ég smyr oftast á þessa er gamla góða súkkulaðismjörkremið. Uppskriftina finnið þið hér. Mér finnst klassískt vanillusmjörkrem eða saltkaramellukrem einnig passa afskaplega vel með þessari köku en smjörkremsfærsla er væntanleg.

Fullkomin dúnmjúk súkkulaðikaka sem þið ættuð að baka við fyrsta tækifæri!

XOXO

Stella Rún

Sætir molar/ Skreytingar og veisluhugmyndir

Rocky Road nammibitar – hættulega góðir

rocky road i dunk

Þessi jólin var meira um heimagerðar gjafir en oft áður. Það vantar einhvern veginn engan neitt og þá finnst mér bráðsniðugt að búa til eitthvað sem fer bara upp í munn og ofan í maga. Sörurnar eru skemmtileg gjöf en það er líka gaman að útbúa gómsæta nammibita sem hægt er að bera fram í skálum og njóta með fjölskyldunni.

Rocky Road nammibitar eru hættulega góðir. Ég hef séð margar útfærslur og það er í raun skemmtilegt að setja í blönduna það sem manni sjálfum finnst best. Ég er t.d. lítill aðdáandi jarðhneta og sleppi þeim því og hef tvöfaldan skammt af kasjúhnetum í staðinn. Annars vegar ristaðar og saltaðar og svo hreinar án viðbóta. Ég hef séð uppskriftir þar sem að Lindu buff er notað í stað sykurpúða og þar sem að döðlum er laumað með. Um að gera að láta ímyndunaraflið ráða enda ekkert heilagt í þessum Rocky Road málum.

Rocky Road nammi

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Nammi
Prep Time: 30 mín Total Time: 1 klst og 30 mín

Einfalt og gott sælgæti sem er gott að gefa, himneskt að njóta.

Ingredients

  • 1 poki litlir sykurpúðar, fást t.d. í Söstrene Grene
  • 150 gr kasjúhnetur, saltaðar og ristaðar
  • 150 gr kasjúhnetur eða kasjúbrot
  • 360 gr eða 3 pokar Dumle karamellur
  • 900 gr suðusúkkulaði, e.t.v. meira

Instructions

1

Skerið Dumle karamellur í 3-4 bita og saxið hnetur miðlungsgróft.

2

Blandið saman í skál sykurpúðum, karamellum og hnetum.

3

Bræðið yfir vatnsbaði suðusúkkulaðið.

4

Hellið suðusúkkulaðinu yfir sykurpúðana, karamellurnar og hneturnar. Það gæti verið að þið þyrftuð að bræða 1-2 aukaplötur af suðusúkkulaði til að ná að hjúpa allt saman vel.

5

Setjið bökunarpappír í stórt eldfast mót og hellið blöndunni í mótið.

6

Þjappið namminu vel í mótið og kælið.

7

Skerið í munnbitastærð og njótið!

8

Geymist í kæli eða frysti.

Notes

Þetta er frekar stór uppskrift en að sjálfsögðu hægt að helminga ef nammið er hugsað til einkanota. Eða eiga bara nóg til, þetta geymist vel í frysti. Ég skar þetta allt saman niður og deildi í poka og dúnka og laumaði með í jólapakkana.

Jólin eru ekki búin – um að gera að henda í einn skammt af þessum gómsætu nammibitum!

XOXO

Stella Rún

Skreytingar og veisluhugmyndir/ Veislumatur

Fiskisúpan hans pabba

fiskisupa med bollu

Jólin 2019 eru engin undantekning frá fyrri árum. Það eru búnar að vera margar veislur og maður er ítrekað búinn að borða yfir sig. Allt eins og það á að vera. Það kemur hins vegar alltaf að því að maður er eiginlega búinn að borða yfir sig af jólasteikum. Pabbi sló því heldur betur í gegn í gær þegar hann bauð okkur upp á dásamlega góða fiskisúpu. Þykk og bragðmikil með nóg af góðu sjávarfangi, akkúrat það sem að maginn þráði.

Þegar ég hugsa um pabba í eldhúsinu koma alls konar fiskréttir upp í hugann enda er hann gamall sjóari alinn upp af gömlum sjóhundum og fiskverkakonu. Það var pabbi sem kenndi mér að fiskur og sjávarfang getur líka verið veislumatur. Í raun kenndi hann mér líka að fiskur getur verið algjör hversdagsmatur en við förum ekki nánar út í það hér. Súpan var hins vegar algjört sælgæti – því lofa ég!

Fiskisúpan hans pabba

1 Star2 Stars3 Stars4 Stars5 Stars (No Ratings Yet)
Loading...
Sjávarréttir
Serves: 6-8

Bragðmikil og sérlega góð fiskisúpa. Sannkallaður veislumatur án þess að vera þungt í maga.

Ingredients

  • 2 gulir laukar
  • 400 gr gulrætur
  • 100 gr smjör
  • 2 msk olía
  • 2 dósir hakkaðir tómatar
  • 100 gr rjómaostur (má sleppa en gefur gott bragð)
  • 1/2 l rjómi
  • 800 ml vatn
  • 1 flaska tasty humarkraftur
  • Salt og pipar, eftir smekk
  • 50 cl koníak (má sleppa)
  • 800 gr þorskur
  • 800 gr bleikja
  • 1/2 kg smáhumar

Instructions

1

Laukar og gulrætur skorið smátt og látið mýkjast hægt við miðlungsháan hita í smjörinu og olíunni.

2

Því næst er tómötum, vatni, rjómaosti, rjóma, og krafti bætt út í og látið krauma vel saman. Smakkað til með salti og pipar.

3

Maukað með töfrasprota ef vill og koníakið sett saman við. Smakkað til enn og aftur.

4

Fiskurinn skorinn í munnbitastærðir og settur út í snarpheita súpuna, ásamt humrinum, rétt áður en hún er borin fram.

5

Borin fram með góðu brauði og e.t.v. hvítvínsglasi.

Notes

Tasty humarkraftinn hef ég séð í flestum matvörubúðum en ef hann finnst ekki er vel hægt að nota fiskikraft. Í þennan skammt af súpu þarf tvo teninga eða tvær matskeiðar af krafti.

Í raun er það sérlega viðeigandi að þessi uppskrift skuli birtast á síðunni í dag, 29. desember, en það var einmitt afmælisdagur Dodda afa sem vann á sjó alla sína tíð og elskaði allt sjávarfang. Við höfum því yfirleitt haft þann háttinn á þessa daga á milli hátíðanna að elda mikinn fisk og sjávarrétti.

Njótið vel!

XOXO

Stella Rún

Hagnýt ráð/ Sætir molar/ Skreytingar og veisluhugmyndir

Sörur á einfaldan máta

sorur a diski

Sörur eru þær smákökur sem einhvern veginn hringja inn jólin. Ég elska að sitja og dunda við þessar fínlegu smákökur, einhvers konar æfing í núvitund. Ég hef bakað þær nokkrar í gegnum tíðina og prófað nokkrar uppskriftir. Þar sem að ég er alltaf að leita leiða til að einfalda lífið var ég svo glöð þegar ég rakst á uppskriftina hjá www.ljufmeti.com. Það sem heillaði hvað mest var að sú uppskrift krafðist þess ekki að maður sjóði saman vatn og sykur fyrir kremið heldur er notast við sýróp. Þetta er því sú uppskrift sem ég hef notað allar götur síðan. Ég hef gert nokkrar breytingar því smekkur manna er jú misjafn. Ég vil t.d. hafa kremið í sætara lagi og nota meira sýróp en í upprunalegu uppskriftinni. Einnig hef ég prófað að nota til helminga kakó og kakómalt í kremið sem mér finnst gefa einstaklega gott bragð.

Einfaldar sörur

1 Star2 Stars3 Stars4 Stars5 Stars (No Ratings Yet)
Loading...
Serves: ca. 50 stk
Cooking Time: 15 mín

Eins og áður kom fram er þessi uppskrift upprunalega frá www.ljufmeti.com en með smávægilegum breytingum.

Ingredients

  • 3 eggjahvítur
  • salt á hnífsoddi
  • 200 gr möndlumjöl
  • 180 gr flórsykur
  • 6 eggjarauður
  • 150 ml sýróp, velgt
  • 300 gr smjör, mjúkt
  • 2 tsk instant kaffi, leyst upp í 50 ml af heitu vatni
  • 3 msk kakó
  • 1-2 msk kakómalt (má sleppa)
  • 300 gr suðusúkkulaði, e.t.v. meira

Instructions

1

Hitið ofninn í 180 gráður, undir/yfir

2

Þeytið eggjahvítur og salt þar til eggjahvíturnar eru alveg stífþeyttar og hægt er að hvolfa skálinni án þess að nokkuð sullist.

3

Sigtið saman möndlumjöl og flórsykur.

4

Blandið sigtaðri möndlublöndunni varlega saman við eggjahvíturnar þar til að nokkuð þéttur massi hefur myndast.

5

Setjið deigið í sprautupoka með stórum hringlaga stút. Þetta er ekki nauðsynlegt en góð leið til að fá botnana jafna og fallega.

6

Sprautið deiginu á sílikon makkarónumottur eða bökunarpappír og sprautið deiginu í litla hringi.

7

Sléttið úr toppum sem gætu hafa myndast á botnunum með því að dýfa fingri í vatn og strjúka yfir toppinn. Þetta skref er ekki heldur nauðsynlegt en fagurfræðilega gott.

8

Bakið botnana í miðjum ofni í 15 mín.

9

Útbúið kremið.

10

Þeytið eggjarauður þar til ljósar og þykkar.

11

Hitið sýróp í örbylgju í ca 60 sekúndur.

12

Hellið sýrópinu í mjórri bunu út í eggjarauðurnar á meðan hrærivélin gengur.

13

Skiptið mjúku smjörinu í þrennt og bætið út í eggjarauðurnar. Krem ætti að myndast og vera orðið glansandi þegar að smjörið er allt komið út í.

14

Bætið þá 2-3 tsk af instant kaffinu, kakóinu og kakómaltinu saman við. Hrærið þar til allt er vel komið saman.

15

Smakkið til. Það gæti þurft aðeins meira kaffi, kakó eða kakómalt.

16

Smyrjið mjúki kreminu á sörurnar með teskeið og kælið vel.

17

Bræðið suðusúkkulaði yfir vatnsbaði.

18

Dýfið köldum sörunum í bráðið súkkulaðið þannig að kremið sé hulið.

19

Njótið með góðum kaffibolla (er mér sagt - ég drekk ekki kaffi)

Notes

Mér finnst varla taka því að byrja á þessum bakstri ætli maður ekki að gera a.m.k. tvöfalda uppskrift. 1 og hálf uppskrift af kreminu dugar vel fyrir tvöfalda uppskrift af botnum. Ég nota bæði kakó og kakómalt til að fá aðeins mildara og sætara bragð af kreminu en það er algjört smekksatriði. Ef að kremið virðist ætla að skilja sig eða ef áferðin er hálf kekkjótt má bæta smá smjöri saman við eða kæla kremið í smástund og hræra upp í því á ný.

Þið verðið ekki svikin af þessum sörum!

XOXO

Stella Rún

Brauð og gerbakstur/ Morgunmatur/brunch/ Skreytingar og veisluhugmyndir

Allra bestu skinkuhornin

skinkuhorn i skal

Ég held að ég geti sagt með fullri vissu að það vinsælasta sem ég baka eru skinkuhorn. Þau hafa rúllað út úr ofninum hjá mér í þúsundavís og alltaf klárast upp til agna. Uppskriftin er upprunalega úr Disney matreiðslubók en eins og svo oft áður hef ég gert breytingar og að mínu mati, bætingar. Mig langar að segja ykkur frá nokkrum hlutum sem ég geri sem tryggja mjúk og góð horn í hvert skipti. Nokkur hernaðarleyndarmál ef svo má að orði komast.

  • Aldrei baka bakkelsi úr gerdeigi á blæstri. Auðvitað er það alveg í lagi en mér finnst afurðin vera þurrari og harðari undir tönn.
  • Nota minna hveiti en meira og hafa deigið svolítið klístrað áður en það fær að hefast.
  • Setja hóflega af fyllingu inn í en loka hornunum vel svo ekkert leki úr þeim. Það er bara sóun á góðri fyllingu að mínu mati.
  • Nota bláa brauðhveitið frá Kornax. Það gerir gæfumuninn.
  • Vera þolinmóður – þetta er dundbakstur.

Skinkuhorn

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Gerbakstur Bakkelsi
Serves: 48 horn
Prep Time: 70-90 mín Cooking Time: 15-18 mín Total Time: 2-3 klst

Mjúk og góð horn sem klárast alltaf á svipstundu.

Ingredients

  • 500 ml mjólk (ég nota nýmjólk)
  • 100 gr smjör
  • 1 bréf þurrger
  • 1 msk sykur
  • 2 tsk salt
  • 800 gr brauðhveiti (í bláu pokunum)
  • 1 box skinkumyrja
  • 100 gr rjómaostur (má sleppa)
  • 100 gr skinka, smátt skorin
  • 150 gr rifinn ostur
  • 1 stórt egg (eða tvö minni)
  • Sesamfræ

Instructions

1

Setjið mjólk og smjör í skál sem þolir að fara í örbylgjuofn og bræðið saman þar til smjörið er uppleyst og blandan fingurvolg.

2

Færið yfir í hrærivélarskál. Bætið gerinu og sykrinum saman við, hrærið lítillega og látið standa í 5 mín. Gerið á að freyða í blöndunni.

3

Bætið saltinu og hveitinu saman við og látið krókinn á hrærivélinni hræra þar til að deigið er slétt og samfellt. Það er ekki nauðsynlegt að nota hrærivél en þá er bara að hnoða í höndunum þar til að deigið er vel komið saman og nokkuð slétt.

4

Smyrjið deigið með smávegis bragðlítilli olíu (ekki nauðsynlegt en auðveldar við að fletja út).

5

Breiðið rakan klút yfir skálina og látið hefast í 1 klst.

6

Blandið saman skinkumyrju, rjómaosti, skinku og rifnum osti þar til allt er vel blandað og geymið.

7

Hitið ofninn í 180-190 gráður (fer eftir ofnum). Ég nota undir/yfir hita.

8

Skiptið deiginu í 5 - 6 hluta (fer eftir því hversu stór hornin eiga að vera).

9

Fletjið einn hluta út í einu þar til að deigið er í laginu eins og miðstærð af pizzu (ekki nákvæm vísindi).

10

Skerið í 8 "pizzu"sneiðar með pizzahjóli.

11

Notið tvær teskeiðar til að setja skinkumyrjufyllingu á hverja og eina "pizzu"sneið og rúllið upp í horn. Til að koma í veg fyrir að fyllingin leki út úr hornunum er gott að klípa endana saman og loka þeim þannig.

12

Raðið 16 hornum á bökunarplötu með bökunarpappír, penslið með egginu og stráið sesamfræjum yfir.

13

Bakið í 15-18 mín í miðjum ofni. Fylgist vel með frá 14 mín. Hornin eiga að vera gullin að ofan en frekar ljós til endanna.

Notes

Mjög mikilvægt að passa uppá að mjólkurblandan sé ekki of heit þegar að gerinu er bætt saman. Ef gerið freyðir ekki eftir nokkrar mínútur er það líflaust og blandan ónýt. Þá er ekkert annað að gera en að byrja uppá nýtt. Ég mæli með að nota brauðhveiti í allan gerbakstur. Mér finnst það gera gæfumuninn enda ætlað sérstaklega í þess konar bakstur. Ég kaupi alltaf Kornax hveitið í bláu pokunum og útkoman undantekningarlaust mjúk og góð horn.

Ef þið eruð grænmetisætur en langar samt í gourmet ostahorn að þá er ekkert annað en að nota smurost án kjöts og sleppa skinkunni.

Það er vel þess virði að taka smá tíma í að útbúa þessi horn fyrir næsta fjölskylduboð eða bara með heitu súkkulaði nú á aðventunni. Þið verðið ekki svikin!

XOXO

Stella Rún

Kökur/ Skreytingar og veisluhugmyndir

„Hummingbird“ kaka – beint frá Suðurríkjunum

Hummingbird kaka med kaffinu

Ef það er einhver kaka sem ég á erfitt með að standast er það góð gulrótakaka. Það er eitthvað við kryddaða, mjúka botnana og ómótstæðilegt rjómaostakremið sem ég fell alltaf fyrir. Ég á einmitt frábæra uppskrift að gulrótaköku sem þið getið fundið hér.

En þessi færsla er ekki um gulrótaköku heldur náskyldan ættingja sem ég rakst á á flakki mínu um bandarísk matarblogg (iðja sem ég stunda mjög reglulega). Samkvæmt Google vini mínum er uppskriftin upprunalega frá Jamaica en þaðan hefur hún svo borist til Suðurríkja Bandaríkjanna. Þar náði hún gríðarlegum vinsældum og er mest lesna uppskrift Southern Living Magazine frá upphafi. Ég hef ekki fundið íslenskt heiti yfir þessa köku en ætli við getum ekki kallað hana kryddaða bananaköku eða leyft okkur hreinlega að sletta smávegis og kalla hana sínu rétta nafni, „hummingbird“ kaka. Í raun er uppskrift þessi svo náskyld gulrótaköku að í aðalatriðum er bara búið að skipta út gulrótum fyrir stappaða banana. Ef þið elskið gulrótaköku og bananabrauð jafnmikið og ég að þá er ég viss um að þið munið elska þessa köku!

Hummingbird kaka

1 Star2 Stars3 Stars4 Stars5 Stars (No Ratings Yet)
Loading...

Ingredients

  • 3 bollar hveiti
  • 1 tsk kanill
  • 1 1/2 tsk salt
  • 1/2 tsk múskat
  • 1 tsk matarsódi
  • 3 egg, pískuð saman
  • 1 1/2 bolli sykur
  • 1 1/3 bolli bragðlítil olía
  • 1/4 bolli AB mjólk
  • 2 tsk vanilludropar
  • 4 vel þroskaðir bananar, stappaðir
  • 1 dós kurlaður ananas
  • 1 bolli pekanhnetur, smátt skornar

Instructions

1

Hitið ofninn í 180 gráður (ég nota undir/yfir stillinguna).

2

Smyrjið þrjú 20 cm kökuform og setjið bökunarpappír í botninn. Þetta tryggir það að kakan losni auðveldlega frá forminu í heilu lagi.

3

Blandið hveiti, kanil, salti, múskati og matarsóda saman í stórri skál.

4

Bætið eggjum, sykri, olíu, AB mjólk og vanilludropum í skálina og blandið þar til öll hráefni eru komin saman. Varist að hræra of mikið.

5

Skiptið deginu jafnt í formin þrjú og bakið í miðjum ofni í 25-30 mínútur.

Rjómaostakrem:

  • 230 g smjör við stofuhita
  • 230 g rjómaostur við stofuhita
  • 700 g flórsykur
  • 2 tsk vanilludropar
  • 1 tsk salt

Setjið öll hráefni í hrærivélarskál. Mér finnst óþarfi að þeyta smjörið eitt og sér áður en öðrum hráefnum er bætt út í. Gætið þó að hræra mjög hægt til að byrja með svo flórsykurinn fari ekki út um allt. Aukið hraðann og hrærið í 5-7 mínútur eða þangað til að kremið er orðið létt og ljóst.

Kokusneid og blom
Falleg kaka og falleg blóm

Þegar að botnarnir hafa kólnað er óhætt að setja kökuna saman og smyrja hana með kremi. Ég ákvað að stytta mér aðeins leið í þetta skiptið, enda gestirnir mættir, og setja kremið aðeins á milli laga og ofan á kökuna. Það kom bara vel út en auðvitað hefði verið hægt að smyrja hliðarnar líka.

XOXO

Stella Rún

Meðlæti/ Morgunmatur/brunch/ Skreytingar og veisluhugmyndir

WOW spicy túnfisksalat

Tunfisksalat

Það er nú einhvern veginn þannig með þetta líf að það tekur stundum óvænta stefnu og leiðir mann á nýjar og spennandi slóðir. Það var einmitt svoleiðis upplifun þegar ég réð mig til starfa hjá WOW Air í kjölfar fæðingarorlofs í byrjun árs 2017. Þið hafið eflaust mörg heyrt talað um sérstakan anda innan fyrirtækisins, WOW hjartað og WOW fjölskylduna, en þannig var þetta einmitt, svo miklu meira en bara vinnustaður.

Við í deildinni minni komum okkur fljótlega upp mörgum skemmtilegum hefðum tengdum mat og yfirleitt vorum við með vegleg morgunverðarhlaðborð á vinnuhelgum. Þá héldum við iðulega í Brauð&co og keyptum ilmandi nýbakað súrdeigsbrauð og oftar en ekki laumuðust með í pokann spicy túnfisksalat, ein dolla eða tvær. Já eða þrjár. En þar sem að tilbúin salöt eru oft dálítið dýr ákváðum við Agnes vinkona að gera okkar eigin útgáfu af þessu sérlega ljúffenga túnfisksalati.

Úr varð mitt uppáhalds brauðsalat, svolítið sterkt en samt svo ljúft. Við gerðum tvöfalda uppskrift í hvert skipti sem alltaf kláraðist upp til agna! Seinna varð þetta salat svo ómissandi í föstudagskaffi annarra deilda innan WOW og því tilvalið að kenna salatið við þetta frábæra flugfélag sem við elskuðum svo mörg og söknum mikið.

Spicy túnfisksalat

1 Star2 Stars3 Stars4 Stars5 Stars (No Ratings Yet)
Loading...
Brunch
Prep Time: 15 mín Cooking Time: 15 mín Total Time: 30 mín

Fullkomið brauðsalat sem smellpassar í brunch-inn eða veisluna.

Ingredients

  • 1 dós túnfiskur í vatni
  • 200 g majónes
  • 1-2 tsk sambal oelek chilimauk
  • 1/2 rauðlaukur, smátt skorinn
  • 1/2 grænt epli, smátt skorið
  • 3 harðsoðin egg

Instructions

1

Best finnst mér að byrja á að sjóða eggin svo þau hafi tíma til að kólna almennilega.

2

Næst blanda ég vel saman túnfiskinum, majónesi og sambal oelek og smakka til. Ég vil hafa salatið aðeins sterkt af því að sterka bragðið úr chilimaukinu er svo gott með brakandi grænu eplinu.

3

Þar næst sker ég laukinn og eplið smátt og blanda saman við túnfiskhræruna.

4

Þá er bara að taka skurnina af eggjunum*, skera þau í eggjaskera og blanda saman við restina af hráefnunum og voilá!

Notes

*Smá tips frá mér til ykkar varðandi eggjasuðuna. Það auðveldar vinnuna við að taka skurnina af til muna að bæta einni matskeið af matarsóda út í vatnið sem eggin sjóða í. Prófið þetta og þakkið mér síðar!

WOW spicy túnfisksalatið er sérlega ljúffengt með góðu súrdeigsbrauði eða nýju snittubrauði. Þeir sem eru að minnka neyslu á brauði geta sneitt grænt epli í þunnar sneiðar og smurt salatinu á – algjört sælgæti!

XOXO

Stella Rún

Kökur/ Skreytingar og veisluhugmyndir

SúkkulaðikakAN með greini

sukkuladikaka m sprinkles

Ef ég þyrfti að velja eina köku til að baka út lífið að þá yrði það þessi kaka. Hún er einföld, sjúklega góð og þægileg að skreyta. Þessi kaka helst mjúk og góð í marga daga og er tilvalin sem skúffukaka í þokkabót. Í einu orði sagt, hin fullkomna súkkulaðikaka – súkkulaðikakAN!

1 Star2 Stars3 Stars4 Stars5 Stars (1 votes, average: 5,00 out of 5)
Loading...
Kökur
Prep Time: 15 mín Cooking Time: 30-35 mín Total Time: 50 mín

Þetta deig passar fullkomlega í þrjú 20 cm bökunarform. Eigi kakan að vera hærri en þrír botnar þarf að gera eina og hálfa uppskrift. Uppskriftin passar líka vel í skúffukökuform og er í raun dásamleg sem slík.

Ingredients

  • 5 dl hveiti (270 gr)
  • 5 dl sykur (415 gr)
  • Rúmlega 1 dl kakó (80 gr)
  • 1 tsk salt
  • 1 tsk matarsódi
  • 1 tsk lyftiduft
  • 2 egg
  • 2 dl kalt vatn
  • 2 dl AB mjólk
  • 2 tsk vanilludropar
  • 200 gr brætt smjör

Instructions

1

Hitið ofninn í 170 gráður, undir/yfir.

2

Klippið út 3 hringi bökunarpappír í sömu stærð og formin.

3

Spreyið formin með bökunarspreyi (eða smyrjið þau með smjöri) og látið bökunarpappír í botninn.

4

Setjið öll þurrefnin saman í skál og blandið vel.

5

Bætið í skálina eggjum, vatni, AB mjólk og vanilludropum. Hrærið lítillega.

6

Bræðið smjörið. Ég nota yfirleitt örbylgjuofninn.

7

Látið heitt smjörið saman við deigið og hrærið vel. Það munu vera smávegis kekkir í deiginu en það kemur ekki að sök.

8

Skiptið deiginu jafnt á milli formanna þriggja.

9

Bakið í 30-35 mín eða þar til að pinni sem stungið er í kökuna miðja kemur hreinn út.

Notes

Mér finnst best að draga fram vogina fyrir þessa köku. Vigti maður innihaldsefnin fær maður alltaf sömu kökuna. Það er ekki eins nákvæmt að nota desilítramálið en dugar þó alveg. Þar sem að ofnar eru svo mismunandi finnst mér best að athuga með kökuna þegar að 5 mín eru eftir af bökunartímanum, sumsé eftir 25 mín. Ég athuga svo aftur eftir 30 mín o.s.frv.

Eins og kom fram hér að ofan er þessi kaka fullkomin til að skreyta. Hún er vissulega mjúk en ekki svo mjúk að það sé ekki hægt að stafla henni og skreyta án vandræða. Ég hef skreytt hana í ótal mismunandi útgáfum og nota þá smjörkrem. Uppskrift að súkkulaðismjörkremi með sýrópi má finna hér að neðan en það er von á sérstakri smjörkremsfærslu innan skamms sem ætti að gefa ykkur fleiri hugmyndir og meira frelsi í skreytingum.

Súkkulaðismjörkrem:

  • 250 gr mjúkt smjör
  • 500 gr flórsykur
  • 1 tsk salt
  • 1 tsk vanilludropar
  • 6-7 msk sýróp
  • 4 msk kakó
  • 1 egg (má sleppa)

Hrærið öll innihaldsaefni vel og lengi í hrærivélinni þar til að kremið er orðið létt og ljóst. Liturinn á að vera svona karamellubrúnn. Ef þið viljið henda í spariútgáfuna af þessu kremi er dásamlegt að bræða eina plötu af suðusúkkulaði og bæta út í kremið í mjórri bunu og hræra vel.

Smyrjið vel af kreminu á milli botna og þunnu lagi utan á. Þetta þunna lag köllum við „crumb coat“ en það lokar inni alla mylsnu og kemur í veg fyrir að lokalagið af kreminu sé smitað af kökumylsnu. Kælið kökuna lítillega og leyfið mylsnulaginu að taka sig. Smyrjið svo að lokum vænu lagi af kremi utan og ofan á kökuna og skreytið að vild. Voilá! Fullkomin sunnudagskaka. Eða afmæliskaka. Eða bara kaka. Það er jú alltaf tilefni fyrir góða köku!

Njótið sem allra best og leyfið hugmyndafluginu að leika lausum hala í skreytingunum.

XOXO

Stella Rún